Hallvard Band deka ngeluarka album baru

Hallvard Band ti ditumbuhka dalam taun 2014 nyin suba diatu mengkang sereta majak aktif enggau show, ngaga lagu, video muzik lagu Iban enggau Bidayuh. Album ti keterubah sida dikeluarka dalam 2017 suba enggau lagu popular sida Saritu Enggau Pagila; mengkang popular datai ke sehari tu.

Raban Hallvard iya nya Vanden Machael (Ketuai), Ella Michael (vokalis), Yazit Chin, Roslan Bong, William Galben enggau Isaac Romano.

Isaac Romano nya raban baru Hallvard Band: nukar Gerald ke diatu gawa jauh ba endur bukai. Taja pan pia, Gerald mengkang nyadi raban Hallvard Band datai ke diatu.

Lagu Tebilang

Album keterubah Hallvard Band dikeluarka dalam taun 2017. Entara lagu popular sida nya Sehari Tu Enggau Pagila. Lagu nya nyadi lagu hits lalu nya mih lagu ti udah ngangkat sereta ngelekatka nama sida ba industri muzik Dayak.

Ella Michael (tiga kiba) ngarapka album baru sida diterima peminat.

Ditanya gaya sambut orang ba album enggau lagu Sehari Tu Enggau Pagila, Ella Michael madah lagu nya mai tuah ngagai sida sebuat laban nerima sambut tu chukup badas ari peminat lagu pop Iban.

“Puji Tuhan laban Sehari Tu Enggau Pagila udah ngangkatka nama kami. Kami mega terus dikelala orang nengah Saritu Enggau Pagila. Terima kasih ngagai semua pengeluar program radio ( DJ radio ) laban semampai masang lagu ari kami”, ku Ella Michael ke diatu gawa nyadi pengajar ngajar subjek Sejarah ba siti sekula sekondari di Kuching.

Album Baru

Populariti tauka nama siku-siku artis tetap dikeingatka peminat iya enti artis nya seruran bisi lagu baru. Siti lagu popular bisi masa tauka timpuh endur iya dikerindu baka peminat. Meri komen pasal lagu baru, Ella Michael madahka sida deka ngeluarka single baru dalam taun 2019 tu.

“Enti nadai penanggul kami sebuat deka ngeluarka single baru kami dalam taun tu.

Ella Michael maya diambi nyadi akim pekit belagu ba Am Lepak Music Cafe.

“Nama enggau konsep lagu nya bedau ulih ulih dipadahka dulu laban diatu kami agi milih (short listed) beberapa itu lagu iya ti pemadu badas. Iya ti bendar kami enggai kelalu berumban laban takut asil iya ila tau nyadi enda badas.

Diatu semua artis Iban enda berumban ngeluarka album tauka single sida laban nyaga kualiti”, Ella Michael sekali agi bekunsika penemu diri.

Peminat Hallvard Band arap terus besabar nganti lagu baru ari sida. Naka ke diatu Hallvard Band udah bisi peminat tauka ‘followers’ kediri empu. Hallvard Band mega ukai semina dikelala peminat lagu Iban di Kuching aja tang sida mega dikerinduka peminat Bidayuh kelebih agi pelilih Serian.

Nengah Hallvard Media Works, Hallvard Band ngerembaika pengawa enggau aktiviti bisnes sida ngaga video muzik artis Bidayuh enggau Iban.

“Apin lama tu tadi Hallvard Media Works udah mujur nembuka video muzik album baru ari NK Yongai, Geregaya Ati. Sebedau nya kami mega bisi ngaga video muzik ke siti single lagu Bidayuh ke diberi nama Renteb.

“Ba video muzik nya vokalis kami Ella Michael diambi nyadi model dia”, ku Vandel Michael, pemain keyboard enggau ketuai band.

Kelimpah ari dua iti muzik video nya, Hallvard Media Works mega bisi bekereja sama enggau Rusa Music.

Ba kolaborasyen nya Hallvard Band enggau Rusa Music ngaga siti video muzik ke lagu Biarkan.

Ngagai sapa ti deka ngaga video muzik ke lagu enggau album baru, kita tau betanya ari Vanden Michael nengah page enggau facebook iya tauka Hallvard Band empu.

Kita mega tau betanya ari Ella Michael nengah facebook enggau instagram iya.

Ngeluarka album enggau single nya nyadi pasport ke siku-siku artis solo tauka band.

Nengah lagu popular sida terus dikelala mensia mayuh lalu ari nya mega sida ulih ngelakuka diri ba show enggau konsert.

Sekeda ari palan ke suah ngambi bala artis kitai merindang nya funfair, karaoke pub, cafe enggau bistro, rumah asap kelimpah ari aktiviti pemerindang di rumah panjai tauka di mengeri. Kadang-kadang pengerami ari opis perintah enggau swasta suah mega ngundang bala artis belagu.

Iya ti bendar artis kitai Iban ukai semina nguntungka sida iya empu aja tang sida mega suah mantu ngemujurka pengawa perintah perintah baka pengerami ti diatur RTM.

Raban korporat mega suah ngundang artis Iban lalu nya siti ari jalai penatai pemisi artis kitai di Sarawak. Nyau munyi ke salah jaku, artis kitai diatu enda ulih kelalu ngarapka asil ari album sida iya aja.

Konsert Mantar Gawai 2019

Nitihka padah Vandel Michael ke landik mega ngaga lagu, beserimbai enggau pengerami gawai Dayak ti deka datai tu, Hallvard Band bisi udah semaya diambi orang merindang ba siti rumah asap – Rumah Asap M37 di Serian. Palan rumah asap nya ku Vanden Michael enda jauh ari Taman Anggerik. Ngiga peminat Hallvard Band kelebih kita ti diau di pelilih menua Serian tau datai kia maya nya ila. Maya enggau jam konsert gawai nya deka dipadahka baru ba promo facebook enggau poster ari Rumah Asap M37 udah tu ila.

Arap Diterima Peminat

Ditanya nama pengarap iya ba Hallvard Band, Ella Michael arapka lagu baru ari sida ulih diterima peminat sebaka mega enggau lagu Saritu Enggau Pagila.

“Aku arap kami ulih ngaga lagu enggau muzik ti ulih mgemuaska ati peminat.

“Terima kasih ke penemu enggau sukung kita ngelamatu. Anang leju au bekunsika penemu tauka buah runding enggau kami.

“Anang takut madah au”, ku Ella Michael ke diatu madahka diri agi bedau bisi orang ngempu. Taja pan pia ku iya pekara tawing idup tauka “hal jodoh” manah agi diserah ngagai Tuhan.

Ba gaya peda aku, Hallvard Band nya siti band ke bisi peminat iya empu. Kelimpah enda enda mayuh jaku tauka “always down to earth” Hallvard Band ulih mansang jauh ke mua. Kebuah pia laban sida bisi skil enggau pengelandik bukai kelebih agi ba perengka teknologi digital di studio enggau luar studio.

“Aku meri besau terima kasih ngagai komposer kami, pemuzik enggau penulis lirik lagu kami. Terima kasih mega DJ radio, raban pemberita enggau bala pangan ti semampai nyukung kami”.

“Sukung mih industri muzik kitai laban sapa mih agi enti kitai empu enda.

“Ngagai kitai ti deka begunaka Hallvard Band kita tau betanya ari aku enggau ketuai kami Vanden Michael”, Ella Michael madah ti lalu ngujungka randau kami sebuat.