KUCHING: Siku indai tunggal beranak dua ari Petra Jaya nerima bantu ari Hope Place.
Nitihka penerang ari Hope Place, Nasrisa Narawi , 33 taun udah sarak diatu diau enggau indai sereta anak menyadi iya.
Dikena nupi pengidup sida sebilik, Narisa diatu gawa ba sebuah kedai makai lalu nadai ngembuan penatai pemisi tetap.
Kebuah pia laban penatai pemisi iya semina bepanggai ba asil bejual ke dikeulih iya ari bejual pemakai.
Indai Nasrisa ti beumur 59 taun mantu iya nulung nyaga dua anak indu iya, tang iya mega mantu Nasrisa begiga belanja nengah bejual kuih lebuh musim pengerami.
Penusah ti ditapi sida sebilik begunaka bantu bala mayuh lebih agi rumah kayu sida dipeda nyau deka runtuh beduduk ari struktur ti udah repuk.
Nitihka penerang, rumah ti alai sida diau diatu mega nadai agu ke manah lalu begunaka sida ngangkut ai ngena baldi lebuh deka ngena agu.
Seraya, jalai masuk rumah Nasrisa enda ulih ditengah kereta, tang bejalai kaki enggau pengelama lima minit ngena andau kayu ari jalai besai.
Kelimpah nerima bantu ari opis pengintu pengelantang pendiau, Hope Place meri bantu pemakai sereta perengka guna ke bukai dikena ngurangka penusah ditapi sida sebilik ninting hari.
Mensia mayuh ti deka meri bantu ngagai Nasrisa tau meri bantu nengah Gerempung Pengintu Pengelantang Harapan Kuching ba lumur akaun Maybank 5112-8900-1160 tauka nanya enggau silik ngagai Hope Place ba lumbur telefon 082-505987.
