Indu kemaya hari mayuh pengulih

SIMANGGANG : Indu jeman diatu chukup regas ngereja pengawa nadai tinggal ari sida ke lelaki ba semua pengawa baka dagang kraf, pekara pelajar enggau pengawa bukai nipakka juluk ati enggau pengelandik dikembuan sida.

Kemaya hari tu, raban indu ngembuan penau nyadi ketuai lalu berani nyingkang ke mua ngambi ngubah pengidup ke menyana agi.

Hari Orang Indu Sedunya taun tu nya berambaika jaku ‘Wanita Bangkit Mendepani Cabaran’ #Choosetochallenge tauka tau dikumbai kitai berani napi penguji.

Beserimbai enggau Hari Orang Indu Sedunya ti diintu kena 8 March ninting taun tu, Suara Sarawak ngerandau sekeda bala indu pasal penemu, juluk ati ti deka dijapai sida dalam taun tu.

                                                        CHRISTINA GUYANG

“Indu tu ngembuan besai tanggung pengawa kelebih agi dalam ruang bilik. Ukai nya aja, ba pengawa kraf jari indu diatu mayuh landik betusukka leka manik, landik bedagang enggau ke bukai dikena nyaup nambahka penatai pemisi diri sebilik.

“Maya idup ba chara baru diatu, kitai indu mesti kering enggau liat ati napi penguji lalu mesti mantaika pengulih dikembuan diri. Enti kitai meda, chukup mayuh raban indu bedagang nitihka pengelandik dikembuan sida. Tu chukup setipak enggau rambai jaku Hari Indu Sedunya. Nya alai, aku ngelalau semua bala indu anang takut puntan nguji semua pengawa, semampai nguji dataika kitai berasai tepantup ati. Selamat Hari Orang Indu Sedunya nuju bala indu!,”

MARGARET GREGORY

“Dalam sektor peribit enggau sektor perintah udah mandangka penau raban indu mangku pengawa besai lalu tu mantaika raban indu udah diberi pengandal nangkup pengawa besai. Taja napi penguji lebuh mangku pengawa besai, tang tu peluang besai ngagai raban indu ngerembaika penau sida ngereja pengawa. Pia mega, sektor peribit enggau sektor perintah patut nyendiaka latih ngagai raban indu kelebih agi pengelandik teknologi digital nipakka pemansang dunya,”

REGINA LAMBOR

“Indu tu ngembuan penau, pengelandik enggau pemintar runding dataika ulih besemekih ba mayuh bengkah pengawa. Raban indu diatu mega udah maju sebaka singkang enggau sida ke lelaki lalu dikelala ba serata dunya laban penau sida ngangkat enggau ngubah pengidup ke lebih menyana. Nya alai, mayuh raban indu nyadi chunto beduduk ari penau sida dalam sektor ekonomi, pekara pelajar enggau politik di Malaysia,”

CECELIA LAGAK

“Orang indu mesti berani napi penguji sereta ngangkatka diri ba pengawa dikerindu sida. Sida mesti ngujika nasip diri nitihka pengelandik lalu anang meda pemujur orang bukai aja kelebih agi ba pengawa dagang. Pengelandik dikembuan kitai ulih mantu nambahka penatai pemisi ruang bilik. Nya alai, aku beratika raban indu jeman diatu udah makin maju kelebih agi ba pengawa dagang laban mayuh dagang di Malaysia kelebih agi ba Sarawak tu bekualiti enggau udah rembus ngagai makit entarabansa. Pemujur tu nipakka rambai jaku Hari Orang Indu Sedunya tu,”

ELIZABETH BUNGAN

“Raban indu iya nya orang ti nyukung enggau meransang sida ke lelaki ba genap pengawa lalu raban indu mega semampai bisi sekalika maya tusah tauka senang. Kemaya hari tu, raban indu mega ngembuan pengelandik enggau dagang kediri dikena mantu ruang bilik sida lalu ukai semina ngelempaika tanggung pengawa ngiga jereki ngagai lelaki aja. Nya alai, Hari Indu ti diintu sehari tu engkeman amat dikena kitai ngenang enggau malas jasa, pemanah sereta pengasih sida,”

Suara Sarawak