KUCHING: Kongres Asia Pasifik Serantau (APRC) 2028 deka nyadi pelasar besai negap pengawa nagang enggau munas Tuberkulosis (Tibi) di Sarawak, kelebih agi mutar penanggul igi penyakit nya ngerekai ba kandang menua ulu.
Ditaga diatur ari 23 nyentuk 26 March 2028 di Kuching, kongres diatur International Union Against Tuberculosis and Lung Disease nya kedua kali diatur di Malaysia pengudah Kuala Lumpur ba taun 2007 lalu keterubah diatur di Borneo serimbai Hari Tuberkulosis Sedunya.
Sapit Premier Sarawak, Datuk Amar Prof Dr. Sim Kui Hian madah, tuju kongres nya ukai semina ngempuru pakar perubat aja, tang ngerandang peluang kerejasama strategik dikena nambah pengawa munas Tibi.
“Tuberkulosis udah lama bisi lalu agi nyadi penanggul di Sarawak, lebih agi ba menua ulu. Nengah kongres baka tu, kitai ulih ngempuru penemu pakar enggau peneleba dikena ngiga chara baru ti sidi agi,” ku iya ba aum media ditu, ensanus.
Dr. Sim madah baru, taja bisi penekul ba belanja dikena munas Tibi nya, tang perintah nengeri enggau Perintah Besai tetap ransing nyendia pelin tuju kuing munas ke penyakit nya.
Tambah mega ku iya, sukung ari mayuh taban nyengkaum pemelanja mega mantu negapka pengawa bejalaika inisiatif bekaul pengerai mensia mayuh di Sarawak.
Kelimpah empas ngagai pengerai, APRC 2028 disadang matak lebih 1,000 diligit ari selampur rantau Asia Pasifik enggau meri empas ekonomi dipelaba manggai RM8.2 juta.Sama datai, Chairman APRC 2028, Datuk Dr Abdul Razak Abdul Muttalif enggau Presiden Anti-Tuberculosis Association Sarawak, Louise Blaja. – EDISI UKAS
Jalan Sejingkat–Batang Samarahan dijangka siap suku ketiga 2027
17 October 2026
2 hours lepas
KOTA SAMARAHAN: Projek pembinaan jalan sepanjang 6.3 kilometer dari Jambatan Sejingkat menuju Jambatan Batang Samarahan berjalan mengikut jadual dan dijangka siap pada suku ketiga 2027.
