KUCHING: Bidang injinir terus nyadi penyungkak pemansang Sarawak laban inovasyen teknologi dipeda nyadi kunchi mutarka pemar dunya nyengkaum ubah klimet enggau pemansang ti meruan.
Premier Sarawak, Datuk Patinggi Tan Sri Abang Johari Tun Openg madah, Konvensyen Injinir Antarabansa Universiti Malaysia Sarawak (UNIMAS) (ENCON 2026) ngayanka pemesai guna bidang injinir nyadi jematan entara teori enggau praktikal kenyau ari taun 2007.
“Rambai jaku konvensyen taun tu, Meri Kuasa Industri enggau Mensia Mayuh nengah Inovasyen Injinir ngelai ke bidang tu ukai semina ngaul injin enggau struktur aja, tang meri empas terus ngagai pengidup komuniti.
“Diatu dunya benung napi pemar besai kelebih agi baka ubah klimet ti begunaka chara mutarka penanggul bepelasarka chara saintifik enggau teknologi,” ku iya.
Abang Johari bejaku munyi nya rambau bejadika ENCON 2026 ba siti hotel tebilang ditu, kemari.
Ku iya, Perintah Sarawak udah bejalaika Strategi Pemansang Pengudah COVID-19 (PCDS) 2030 bepelasarka tiga batang pekara iya nya pengelantang ekonomi, penyerakup rama enggau pemeruan rampa menua.
Iya nyemetak madah, pengawa bejalaika polisi nya begunaka sukung raban orang ti landik kelebih agi ba bidang injinir, dikena nentuka pemansang ulih dipejalaika enggau nemban agi.
“Ba sukut injinir menua, Sarawak napi pemar ti nyelai iya nya gaya tanah kerapa ti meri pemar ngagai pengawa ngaga infrastruktur baka jalai alun.
“Ngena chara konvensional baka geotekstil sebedau tu, kitai nemu pengawa nya kurang efektif, nya kebuah kitai ngena chara baru nengah pengawa ngaga jalai beringkat ba atas tanah kerapa.
“Taja pia, chara tu ngena ungkus besai, tang nya ulih ngurangka ungkus ngintu timpuh panjai sereta ngintu kandang endur pun kayu bakau enggau tuju nyadi pun nginsap karbon,” ku iya.
Abang Johari madah baru, injinir kuasa mega nyadi fokus lebuh Sarawak ngalih ari pengawa ngena injin api diesel ngagai kuasa solar di menua pesisir nengah program Skim Alternatif Bekal Kuasa Karan Menua Pesisir Sarawak (SARES).
Ku iya, nengah pengawa tu ngasuh bekal kuasa karan 24 jam disediaka enggau meruan ngagai rayat, seraya nyeliahka rayat bepanggai ba minyak fosil ketegal empas ari rega minyak dunya ti enda tetap.
“Sarawak mega ngena mayuh macham pun penatai kuasa nyengkaum hidro, solar melepung enggau biomass, kelimpah ari mansik teknologi teda ngagai kuasa ti nukar teda nyadi kuasa nyengkaum pengawa ngasilka metana enggau hidrogen.
“Kebendar, teda minyak sawit diatu benung dipansik ngambi ulih ditukar nyadi minyak penerebai bilun ti meruan, lalu nya deka ngerandang peluang baru ba injinir kimia enggau kuasa gadung,” ku iya.
Ngenang pekara bukai, Abang Johari mega berati ke pemesai guna injinir jemah ila nyengkaum ba bidang aeroangkasa enggau pemintar digaga (AI), ke alai data enggau teknologi satelit dikearap nyadi pelasar perambu pemansang nengeri dudi hari.
