PUTRAJAYA: Bayar Insentif Tumu penyampau RM2,000 ngagai semua pengereja opis perintah gred 56 enggau baruh agi nyengkaum kunterik enggau RM1,000 ngagai semua Pangku Pengawa Bebatang Sektor Perintah, dibayar terus kena 23 Februari tu.
Pekara nya dibantaika Menteri Besai, Datuk Seri Anwar Ibrahim lebuh bejaku ba mua mayuh rambau Gempuru Ninting Bulan Begulai Enggau Raban Opis Menteri Wang ditu tadi.
“Bela diberi sepenyampau RM1,000 ngagai semua Pangku Pengawa Bebatang Sektor Perintah ngaul polis, bomba, soldadu, raban ngena senyata enggau semua raban ngena uniform.
“Bayar insentif RM1,000 mega diberi ngagai semua raban pinchin awa perintah nyengkaum veteran bepinchin sereta nadai pinchin,” terang iya.
Anwar ke mega Menteri Wang madah, Bayar Insentif Tumu nya diberi seraya nganti Tungkap Sistem Saraan Servis Perintah (SSPA) diputus.
Iya madah, ripot kepenudi Tungkap SSPA disadang tembu diadu kandang dua bulan, sebedau dibantai ngagai Bala Menteri ngambi pemutus ngemendar digaga.
“Aku udah ngepunka aum penyaris gaji pengereja opis perintah (SSPA) begulai enggau Tuai Sekretari Menua (Tan Sri Mohd Zuki Ali) enggau Tuai Direktor Opis Perintah (Datuk Seri Wan Ahmad Dahlan Abdul Aziz), (seduai) setujuka pekara tu dirumban.
“Aku enggai madahka pekara tu sengaja lubah dikereja, udah ga 12 taun nganti, kitai ngena chara ngerumban,” ku iya.
Dulu ari nya, media mantaika Ripot Interim 1 Tungkap SSPA udah disua ngagai Anwar kena 19 Januari tu tadi.
Menteri Besai nya lebuh mantaika Bajet 2024 di Parlimen kena 13 Oktober nyin tadi ngemendarka pejalai penuh SSPA deka diadu belabuh 2025. – BERNAMA
