BA Lawas, pelilih menua utara Sarawak, Irau Aco ukai semina siti pengerami ti diintu ninting taun. Pengerami tu nyadi panggau besai ti ngempung raban bansa Lun Bawang ari mayuh menua, dikena ngetanka asal penatai, ngayanka main asal sereta negapka identiti diri ti udah dipeturun ari dulu menya.

Lebuh pengerami Irau Aco diatur, Lawas bebali nyadi siti ruai besai ti ngempung bala pengusung enggau raban bansa.

Anak Lun Bawang ari jauh enggau semak deka pulai, datai begulai sereta ngambi bagi ba pengawa ti ngingatka sida ngagai tanah asal, jaku, adat, pengarap enggau pengidup diri empu.

Ba palan nya, lagu asal dipasang sereta didinga baru, gari asal dikena enggau ati ti temegah, pemakai asal dibantai, lalu main asal dipandangka ba panggau ngagai mensia mayuh.

Semua nya ngayanka Irau Aco ukai semina pengerami, tang kedap semengat ti nyaga pesaka raban bansa Lun Bawang ngambi terus idup.

PESAKA ASAL UKAI SEMINA DIKENANG

Raban bansa Lun Bawang nya siti ari raban Orang Ulu ti ngembuan pesaka asal ti berega ba Sarawak. Tebal agi sida diau ba Lawas, Ba’Kelalan, Trusan sereta menua bukai ba utara nengeri tu.

Ba pengidup sida, adat, jaku, pengarap, pemakai, lagu, main asal enggau gari asal ngundan reti ti dalam sereta bekaul rat enggau identiti raban bansa.

Tang ba maya diatu, pesaka asal ukai semina dikena ngenang utai lama aja.

Enti main asal semina disebut dalam jerita, tang enda diajar, enda dikena sereta enda dikereja, lama-lama iya ulih punas.

Nya kebuah Irau Aco ngembuan tanggungpengawa besai dalam pengawa ngetanka pesaka Lun Bawang. Pengerami tu meri awak ngagai pesaka lama dikeingat, dipelajar sereta diidupka baru.

Iya ngasuh nembiak meda, ninga, belajar sereta ngasaika kediri empu nama reti nyadi anak Lun Bawang. Ari nya tumbuh pengerindu ngagai asal penatai diri, lalu ari pengerindu nya datai pengasai ati deka nyaga sereta ngetanka pesaka asal.

Irau Aco mega nyadi palan orang tuai nurunka penemu ngagai anak uchu ichit sida. Sida ulih nerangka reti chura gari, lagu asal, tusun adat, chara nyendiaka pemakai asal enggau jalai pengidup lama.

Enti penemu nya enda diturun, iya ulih lenyau lalu ngetu ba tengah jalai.

REBAK BARU ENGGAU PEMAR DUNYA MODEN

Tating pemadu besai ngagai mayuh raban bansa asal diatu iya nya bakani deka ngeratka kaul nembiak enggau pesaka sida empu.

Mayuh nembiak belajar tauka gawa jauh ari menua asal. Sekeda sida lebih nemu main asal bansa bukai ari main asal bansa diri.

Sekeda agi semina nemu nama pengerami, tang enda nemu reti ti dalam ba pengawa nya. Tang kitai enda ulih nyalah ke sida nembiak.

Dunya udah mayuh berubah, jalai pengidup mega baka nya.

Enti nadai pengawa ti dikereja enggau bepejalai nengah tuju ti terang, main asal dudi ari semina dipeda ba gambar lama, tauka dipandang ba pengawa rasmi aja, tang enda agi bekaul rat enggau pengidup bansa asal ninting hari.

Irau Aco ulih nyadi jematan ti ngerapatka peturun baru ngagai urat asal sida. Tang nembiak enda patut semina diasuh meda aja.

Sida patut diberi awak nyadi pengatur, penulis, ngambi gambar, ngaga video, nyidi jerita asal, ngajar jaku sereta orang ti mantaika main asal ngena kereban digital.

Lebuh nembiak diberi tanggungpengawa tu, sida deka ngasaika pesaka nya utai sida empu, ukai semina utai ti ditinggalka orang tuai.

MAIN ASAL NYUNGKAK DAGANG LOKAL

Kelimpah ari ngetanka pesaka, Irau Aco mega bisi empas ngagai pengawa dagang peranak menua Lawas. Penatai temuai enggau pengusung ulih ngidupka dagang mit, jual pemakai, kraf jari, alai diau, perengka pengangkut enggau pengawa dagang temuai ba menua nya. Tiap bansal ti dibuka, tiap pemakai asal ti dijual, tiap bilik rumah temuai ti disewa, sereta tiap barang dagang asil jari ti dibeli, meri penguntung ngagai peranak menua.

Tu mandangka pengerami main asal, enti diatur enggau manah, ulih nyadi pelasar nyungkak ekonomi ti meri penguntung ngagai rayat. Lawas bisi pengulih besai enti dikemerat nyadi palan dagang temuai main asal ba utara Sarawak. Penuduk menua ti tegap, semak enggau Sabah sereta Brunei mega meri awak ngagai Irau Aco dikerembai ngagai renggat ti lebih besai.

Tang pemansang baka tu mesti diintu enggau bejimat ngambi enda ngurangka nilai adat. Pengerami ulih diatur, promosyen ulih dikerembai, ekonomi ulih dipejalai, tang adat enggau reti main asal meseti diintu sereta tetap nyadi pun pengawa.

KELAI SARAWAK PUPU BANSA

Irau Aco mega mai reti ti besai ngagai Sarawak ti dikelala ngembuan mayuh raban bansa, adat enggau jaku. Ba mayuh chura bansa nya, Lun Bawang ngembuan palan ti beguna ngerembaika penatai asal ke panggau dunya. Lebuh raban bansa Lun Bawang ngerami Irau Aco, sida ukai semina ngayanka main asal diri empu, tang mega mandangka gaya pengidup ba Sarawak ke diuan mayuh pupu raban bansa tang ulih idup begulai.

Nya alai, pengerami baka tu enda patut dipeda semina pulau siti bansa aja, laban iya mega sebagi ari pesaka Sarawak. Tu mandangka pemansang enda patut ngasuh kitai muai penatai asal, tang patut ngajar kitai ngelala agi sereta nyaga asal penatai bansa diri.

JALAI NGETAN PENGINGAT

Enti Irau Aco deka terus dikena dudi hari, pengawa ngumpul sereta nyimpan rekod ninting kali pengerami patut dikemerat. Jerita tuai, lagu lama, tusun adat, reti gari asal, pemakai asal, sejarah menua sereta orang ti ngembuan penemu patut direkod sereta ditaruh enggau manah.

Raban pemekuh media enggau pengerembai berita mega ngembuan tanggungpengawa ti beguna.

Gambar, video, jerita pengidup, randau enggau kereban digital ulih nyadi palan nyimpan pesaka ti beguna dikena anak uchu dudi hari.

Ba dunya moden diatu, main asal enda patut semina idup ba atas panggau aja. Iya mega patut bisi endur disimpan ba dalam kereban digital.

Taja pia, pengawa nyimpan rikod nya ukai semina pengawa luar aja. Sida patut nyerungkai reti, asal penatai, ajar, timbang semengat enggau pesan ti bisi dibantai ba main asal nya.

Nya baru pesaka ukai semina dipeda mata, tang ulih diperati, ditemu sereta dipelajar enggau lurus.

PESAKA PATUT TERUS IDUP

Irau Aco Lun Bawang ngajar kitai beserakup ngetanka pesaka asal ngambika enda punas. Tanggungpengawa nyaga sereta ngintu pesaka asal tu enggau meruan bepanggai ba sida rebak dudi.

Jaku raban bansa ulih lenyau enti enda dikena berandau ninting ari. Lagu asal nadai agi didinga enti enda dipasang.

Adat asal ulih lenyau enti enda diajar. Identiti bansa diri mega ulih kabur enti nembiak rebak baru enda nemu asal penatai diri.

Ba menua Lawas, Irau Aco terus bediri nyadi panggau ti ngempung pengingat, pengerindu enggau pengarap raban bansa Lun Bawang.

Iya ukai semina pengerami, tang tanda nyata madahka pesaka sida agi idup, agi tegap sereta agi bisi seput ba arus pemansang Sarawak.

Pengerami Irau Aco patut terus diintu ngambika semengat bansa Lun Bawang enda lenyau. Pengerami nya deka terus nyadi panggau pesaka, jematan peturun sereta lambang pemansang ti enda muai adat enggau asal penatai bansa.