KUCHING: Gerempung Main Bol Sarawak (FAS) patut mutar isu makai suap ke mungkur ex-sekretari besai enggau pemantu presiden ngena chara manah ngambi enda ngeruga prestasi tim nya.
Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah madahka pemain patut terus negapka momentum lebuh bepekit taja gerempung main bol Sarawak diatu betapi enggau penanggul.
“Sarawak ngembuan pemain ke manah tang anang ngasuh penanggul ke suba ngeruga tim nya.
“Isu tu patut diputar ngena chara manah” ku iya lebuh diasuh bejurai pasal isu makai suap dalam FAS beserimbai enggau aum media pasal Festival enggau Anugerah Filem Entarabansa ASEAN (AIFFA) 2019 ba sebuah hotel tebilang ba ditu, kemari.
Karim mega madah agi nganti ripot pasal kes nya lalu nyerah ngagai Komiti Nagang Makai Suap Malaysia (SPRM) ngambi dipansik.
“Aku nganti ripot pasal pekara tu. Ke diatu, aku bedau nerima penerang ke nyemetak lalu agi dipansik SPRM”
Pengawa makai suap tu mungkur ex exco FAS ditemu lebuh presiden FAS, Datuk Majais mantaika timbal enggau bukti ngagai indu opis Komiti Nagang Makai Suap Malaysia (SPRM) Sarawak ditu.
Posa diripotka deka neritka atur tekala nya ngagai orang ke ngaga lima penyalah makai suap ba taun 2017 mungkur belanja beungkus lebih setengah juta ringgit.
