Isu RTP ‘ginti’ penyakal PRN12

SIBU: Kaban Kunsil Nengeri (Adun) Tamin Ir Chrostopher Gira Sambang ngasaika ulah betenahka Program Transformasyen Menua Pesisir (RTP) deka dikena penyakal bekimpin maya Pengawa Bepilih Nengeri Ke-12 (PRN12).

Ku iya, mayuh bala kaban Pakatan Harapan (PH) enggau ‘cytro’ sida diatu beambi ulih enggau nempa isu sentang agih RTP Kaban Parlimen enggau Adun Gabungan Parti Sarawak (GPS).

“Sida semampai kiruh malut runding rayat madahka pengari rayat GPS ‘makai duit RTP’ sereta enda tebaika pemansang.

“Nyangka tu gaya ‘Modus Operandi’ sida napi PRN Sarawak Ke-12 dipelaba diatur taun 2021 ke alai sida bekimpin enggau nginti undi ngena isu RTP,” ku iya nengah penerang dibantai ba Facebook.

Ku Gira, rayat Sarawak patut pintar runding enggau nemu baka ni RTP dipejalai sereta enda alah asut jaku petenah piak ti sengaja nempa cherita nadai bebatang.

Ir Christopher Gira Sambang

RTP ditibak ari penemu niang Kepala Menteri Tan Sri Pehin Sri Adenan Satem ba taun 2015 dikena ngerumban pemansang menua pesisir ke alai genap Dun diungkup RM5 juta setaun sebedau program ti sama dipejalai bala Kaban Parlimen GPS.

“Agih RM5 juta tu diberi nengah geran projek lalu ukai pansut mata duit nyengenda.

“Bala Adun enggau MP semina ngerintai nama bagi projek ti deka dipejalai ninting taun.

“Ambika chunto, semua rintai projek RTP 2017 enda tau enda dibantai tauka dipadah bulan Oktober tauka November 2016 maya LAB RTP.

“Projek nya deka dipejalai ejensi dipadu gawa baka Opis Kaunsil, Opis Pelilih Menua, Opis Kereja Raya (JKR), Opis Parit enggau Entali Ai (DID) lalu dipatau Opis Residen.

“Ejensi tu beguna amat nentuka projek ulih dirumban, lanchar enggau mujur tembu nitihka standard enggau timpuh ti udah ditetap opis bekaul,” ku iya nerang.

Pia mega ku Gira, bisi sekeda kes ngaul nama tauka endur projek diubah ketegal bisi penekul baka taba projek tauka peranak menua nya enda sepenemu lalu mantah pejalai projek.

“Nya alai enti sema bisi peminta projek ungkup pengelantang kitai tau padah ngagai pengari rayat ngambika sida ngerintaika projek nya ba RTP,” ku Gira madah nyemetak.