Jaga terit agi adan menua Ba’Kelalan – Kalimantan

KUCHING: Kaban Parlimen Selangau ti mega Adun Ba’Kelalan, Baru Bian minta piak bekaul ngambika neritka agi sekat ba genap adan menua pemanjai Kalimantan kelebih agi semak enggau Ba’Kelalan enggau Bario

“Piak bekaul patut bejaga sereta bebendar agi nyaga genap pintu penama enggau CIQ ba pemanjai adan Kalimantan.

“Pekara ti sama mega patut dipejalai ngambika ulih nutup jalai chit ba genap endur pemanjai adan menua tu,” ku iya madah ba siti penerang tadi.

Ku Baru, apin lama ke udah iya bisi nerima penerang ari bala bakih iya di Long Bawan ke dipegai Wilayah Krayan, Kalimantan ke alai dua iku peranak menua nya udah ditemu positif.

“Long Bawan endang ba seberai adan ari Ba K’lalan lalu berita ti madahka sida din udah bisi ditemu positif Covid-19 chukup ngasuh ati kami irau laban Lawas udah dikategori zon gadung,” ku iya nambah.