Jaku Iban patut dipasuk dalam PISMP

KPM dikearap ulih ngangkatka jaku Iban nyadi siti kus dipelajar dalam program PISMP

KUCHING: Perintah Sarawak dipinta berunding manah enggau Opis Menteri Pelajar Malaysia (KPM) ngambi ngangkatka jaku Iban nyadi siti ari kus dalam Program Khas Ijazah Sarjana Muda Perguruan (PISMP).

Kus PISMP jaku Iban tu dipinta dikena ngelatih raban pengajar awakka landik ngajar nembiak ba subjek jaku Iban.

Adun Meluan-PDP Rolland Duat Jubin madahka, KPM udah ngaga kus tu dalam jaku Kadazan Dusun baka ti dipantai ba iklan PISMP renggat bulan June 2019 dikena ngelatih raban pengajar ti ngajar jaku Kadazan Dusun ba Sabah.

“Kena nyaga kualiti jaku Iban sebaka enggau jaku bukai ari Sarawak bala pengajar ti deka ngajar jaku Iban ila ulih dibagi kus sebaka enggau bala pengajar ti ngajar jaku Kadazan Dusun.

Rolland Duat

“Ketegal nya, endang patut Perintah Nengeri Sarawak berunding enggau KPM dalam merambu jaku Iban nyadi siti kus dalam program PISMP,” ku iya.

Rolland bejaku lebuh bejuraika Mosyen Basa Ngagai Jaku TYT ba Aum Kelima Renggat Keempat Dun ke-18 ditu, kemari.

Iya mega minta Perintah Sarawak nengah Opis Menteri Sains enggau Pansik Teknologi Sarawak (MESTR) ngambika nyeruri sekula repuk ba pelilih Dun Meluan.

“Mayuh sekula ba sitak Meluan enda diperati Perintah Besai lalu tu ngasuh sekula tu jauh tinggal ari mayuh bengkah pekara kelebih agi ba insfrastruktur enggau perengka belajar.

“Sebaka enggau juluk ati Perintah Sarawak ti deka ngemansangka pelajar ba bidang Sains, Teknologi, Injinir enggau Matematik (STEM), aku mega minta ngagai Kepala Menteri Sarawak mega Chairman Sarawak Multimedia Authority (SMA) awakka meri pengelebih ngagai ngaga tiang telekomunikasi ba palan sekula menua pesisir kena mantu proses belajar bepelasarka ICT enggau meruan,” ku iya.

MANAH…Adun Pantai Damai, Datuk Dr. Haji Abdul Rahman Haji Junaidi mandangka lambar mua surat kabar Suara Sarawak ti ngundan berita dalam Jaku Iban rambau ngulu Aum Dun kemari.-Gambar Ghazali Bujang

Ngelansa pekara bukai, Rolland mega minta perintah nengah Opis Menteri Pemansang Industri enggau Pengawa Dagang Sarawak meri bantu ngagai sebarang orang dagang ke bepenau muka sebuah stesyen minyak di Dun Meluan.

Ku iya, nyentuk sehari tu Dun Meluan empai bisi stesyen minyak lalu peranak ditu nyau nurun ke Sarikei tauka Sibu Jaya endur meli minyak ke guna ninting hari.

“Tebal agi peranak ditu agi begunaka injin api enggau injin sepit, nya alai stesyen minyak endang patut dibuka ke guna rayat ditu.

“Ketegal kurang minyak dijual di Dun Meluan ngujungka ungkus ngiga minyak nyau ngenusah rayat. Arapka perintah beratika penusah rayat ditu lebih agi sida ke diau jauh di menua ulu.

“Maya undur ke pasar sida tu tepasa meli minyak mayuh nyadika bekal laban enchadika belanja dikena berundang jauh ngagai pasar Sarikei tauka Sibu Jaya,” ku iya.

Suara Sarawak