Jalai alun ba Simpang Merurun patut dikemanah

MELUAN: Jalai Simpang Merurun urung 10 kilometer pemanjai ditu ke balat lichau lebih agi maya hari ujan patut dikemanah raban bekaul lengkas.
Tuai Rumah Barak Anak Rangking,76 taun ari Lubok Ranggil madah jalai nya diatu tusah amat ditengah, lebih agi sida ari tiga buah rumah besemak ketegal jalai ti renjan, bisi ngeruang sereta tau bendar ngeruga pengelikun penguna jalai alun.
“Kebendar, jalai tu suba jalai batang lalu dikemanah perintah sereta tembu dalam taun 2000.
“Udah nya, jalai tu bisi mega udah dipelakin tang semina ba genturung menua kami tiga buah rumah tu lalu apin tembu nyentuk ke diatu.
“Nya alai, aku minta kasih nuju raban ti megai tanggung pengawa lebih agi pengari ke udah dipilih rayat patut nulung kami mutarka penanggul tu,” ku iya sebana ngagai Suara Sarawak.
Pia mega ku iya, jalai tu ukai semina ditengah peranak rumah panjai tang mega bala pengajar enggau staf ba dua buah sekula ti bisi ditu.
“Nya alai, kami di Sungai Merurun ditu ngarapka ulih nengah jalai ti meruan sereta likun baka jalai ba menua bukai,”ku iya.
Ungkup penemu, Jalai Simpang Merurun ti panjai urung 30 Kilometer tu mega ditengah sepenyampau lapan buah rumah panjai ke bukai iya nya Rh Sally Maling,Rh Malang Anggut ba Merurun ditu sereta Rh Anggit,Nanga Belguai, Rh Jimmy,Nanga Sekalong, Rh Robert,Berduie Atas,Rh Ensan,Beduie Baroh,Rh Eddy Jemat,Kelangas Atas enggau Rh Gramong ba Kelangas Baroh.
Udah nya, dua buah sekula primari ke bela nengah jalai tu iya nya SK Kelangas enggau SK Sekalong,Julau.

TR BARAK ANAK RANGKING

Suara Sarawak