Jalai baru digaga rembus ke Data Kakus enggau Pasar Belaga

BELAGA: Menteri Muda Utiliti (Karan Menua Pesisir) ke mega Adun Belaga, Datuk Liwan Lagang bisi nyereta pengawa ngerintis Jalai Alternatif Ari Simpang Uma Sihan Rembus ke Jalai Data Kakus.

“Aram mih kitai bela besampika awakka jalai raya kira 10 kilomter penyauh tu ulih dikemendarka perintah nengeri.
“Enti udah tembu ila, pejalai mensia mayuh ke nengah jalai tu semina beguna awak pengelama 40 minit enti ari Data Kakus ke Pasar Belaga,” ku iya ba sebengkah penerang kemari.

Pengawa ngerintis jalai baru nya mega digaga dikena ngaduka keretas kereja bekaul enggau perambu ngaga jalai alternatif baru ti rembus ba Kampung Data Kakus enggau Pasar Belaga sereta nadai mansa jalai kebun kelapa sawit Tajang Holding Laban kelalu jauh.

Liwan madah entara kebuah jalai nya digaga ngambi ngemuntangka pengawa nyambung tali karan ari Uma Sihan ke Kampung Data Kakus.

Iya mega udah minta bantu JKR Belaga nyendiaka siti keretas kereja enggau lengkas ngambika ulih dikenatai ngagai ketuai atas udah tu ila.

NGERINTIS JALAI…Liwan begulai enggau peranak Sihan Dangan bela bejalaika pengawa ngerintis perambu jalai baru nya, kemari.

Suara Sarawak