SARIKEI: Berita manah ungkup peranak Bukit Kenyau pengudah perintah nengah Opis Menteri Pemansang Genturung Pendiau enggau Wilayah ngemendar agih belanja ngaga jalai ke deka nyambung sitak nya enggau Sarikei.
Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh madah, projek nya beungkus urung RM80 juta enggau jalai sepanjai 17 kilometer (km) ari Kinyau terus ke Sarikei.
Ku iya, projek besai ukai semina ngangkat pengulih Kinyau nyadi sebuah genturung pendiau pengawa berikan tang mega nyungkak ekonomi peranak ba timpuh panjai.
“Penyauh iya 17km ari Kinyau terus ke Sarikei lalu deka betemu enggau jalai semak Sepital Sarikei.
“Meri besai terima kasih ngagai Perintah Besai laban udah ngemendar agih belanja tu,” terang iya.
Len Talif mansutka jaku nya ba Pengerami Ngiling Bidai di Balai Komuniti Sare, ditu tadi.
