KUCHING: Sekeda jalai besai di The Northbank ditutup berindik ari pengawa ngaga stesyen Transit Aliran Automatik (ART).

Nya kebuah, Sarawak Metro Sdn Bhd madah ke sekeda jalai ngelaung deka disediaka berindik ari pengawa nya.

Ku penerang nya, pengawa nutup jalai tu dipejalai ba jalai semak pangsapuri Residen Avona di The Northbank.

“Jalai nya udah ditutup nyentuk pengawa ngaga Stesyen SM07 tembu,” ku iya.

Nya kebuah, penguna jalai alun dipinta nitihka atur jalai maya betengahka endur nya.

Stesyen ART di The Northbank deka nyadi sebagi ari Pemansang Pakej Biru 1 Sistem Pengangkut Mengeri Kuching (KUTS).

Ngenang silik, kunteriktor bekaul udah betemu enggau sekeda peranak dia ngambi nerang pasal kebuah nutup jalai sereta terang altenatif baru empai lama.

Ku iya bala peranak ti datai berandau nyengkaum pengempu kedai besemak enggau peranak Residence Avona.

Nangkan nya, Sarawak Metro ba sebengkah penerang nyemetak madah ke sida keran nentuka penanggul ba jalai nya ulih dikurang sepanjai pengawa ngaga stesyen nya.

Kelimpah ngaga arung khas enggau stesyen ungkup projek KUTS, skop kereja pakej biru 1 enggau biru 2 deka mungkur pengawa nangkir jalai enggau ngemanah infrastruktur bukai.