SELANGAU: Jalai baru tama ngagai Pasar Selangau ari Jalai Besai Pan Borneo deka ngubah landskap sereta ekonomi ba sitak nya.

Premier Sarawak, Datuk Patinggi Tan Sri Abang Johari Tun Openg madah, nya berindik ari jalai tama ke bisi diatu enda engkeman laban jauh ari Pasar Selangau.

“Selangau kala nyadi palan belelak ungkup sida ti nengah Sibu ke Bintulu tang entukar nadai agi nengah Pasar Selangau sekumbang Jalai Besai Pan Borneo udah tembu.

“Enti tu enda dikemanah, entukar nadai agi nengah Selangau lalu ari sukut ekonomi deka kusut… nya kebuah aku merambu ngaga jalai tama baru,” ku iya.

Abang Johari mansutka jaku nya ba aum pemberita pengudah bejadika Projek Rayat Tebing Sungai Selangau enggau Begunan Opis Pelilih Selangau, ditu tadi.

Berebak enggau nya, Abang Johari madahka iya udah minta Opis Kereja Raya (JKR) ngaga tungkap ngaga jalai baru nya lalu meri timpuh nyentuk taun 2025.