MIRI: Jalai tama Kampung Danau putus tumu pagi kemari berindik ari tanah tusur ti nyadi ba tebing bukit nya urung 30 kaki peninggi ketegal ujan bangat ti enda ngetu.

Pengari ari Bilik Operasyen Bomba Sarawak madah, lebuh nerima ripot bekaul penusah nya, seraban bomba dianjung bejalaika pengawa meresa tumu.

Iya madah, lebuh datai ba palan penusah nya, Pegawai Komander Operasyen (PKO) bejalaika pengawa meresa tikas pengelikun enggau empas bukai di endur nya.

“Berebak enggau nya, kami bisi masang tali pengelikun dikena nagang mensia mayuh betengah ke jalai tu,” ku iya ba sebengkah penerang kemari.

Tampung iya, penerang pasal penusah nya bela dikunsi enggau Bilik Operasyen Penusah Pelilih ungkup atur bukai ari ejensi bekaul.

Operasyen nya, ku iya, ngaul tujuh raban bomba enggau siti jentera Fire Rescue Tender (FRT).