Jeba Saga mengkang ngemeranka pengawa beranyam taja diau di mengeri

KUCHING: Pengelandik beranyam ti diajar niang indai iya, balat meransang Wilhelmina Robert Augusta tauka Jeba Saga, 37 enda ninggalka penau nya taja udah diau ba mengeri.

Wilhelmina ti tebilang agi dikanggau ngena nama Jeba asal ari Kampung Entanggor, Sebuyau madahka siti ari chara mantupka pengelenggau ati nuju niang indai ti dikesayau iya nya pengawa beranyam.

“Aku empu sigi rindu beranyam ari mit sereta rinduka pengawa asal kitai, ajar niang indai seruran dikeingatka aku ba pengawa beranyam.

“Pun iya, bakih ngasuh aku ngayam bakul ke iya laban iya nemu aku tu sigi nemu beranyam,” ku iya nusi ngagai pemberita.

Tandu iya, udah bakul bakih iya tembu bala bakih bukai pan lalu meda sereta muji asil jari iya manah.

Entara bakul ti dianyam Jeba.

“Sida ke bukai pan lalu minta gaga ke bakul, ari nya aku alu ransing ati deka ngaga bakul laban peminta ari bala bakih majak mayuh.

“Ngayam bakul tu pengawa maya lepa aku iya nya lebuh ujung minggu laban maya nya aja aku bisi peluang,” ku iya.

Jeba nusi, berengkah ari nya iya alu nguji ngayanka bakul ti dianyam ba media rama baka facebook enggau instagram.

“Ari nya, bisi mega lalu bisi bakih ba media rama minta digagaka bakul, nya ti ngujungka aku ransing agi ngelakuka asil pengelandik jari tu ngena media rama.

“Bakul ti dijual aku nitihka pemesai lalu pemeli ti deka nentuka pemesai enggau chura ti dikedeka sida,” ku iya.

Entara bakul ti dianyam Jeba.

Enggau temegah Jeba madahka bakul ti dianyam iya kala diudar siku bakih nyadika pemeri Krismas ngagai orang di menua Australia.

“Orang ke suah meli bakul aku endang bala bakih, kaban belayan, bakih sama gawa ari Semenanjung enggau ke bukai.

“Enti nadai mindah, aku ulih ngaga dua tauka tiga igi bakul dalam sehari, nya pan enti chura muntang,” ku iya.

Nangkan nya, iya madahka diri ulih ngayam 15 ngagai 20 igi dalam sebulan.

“Semua bakul ti digaga aku endang bisi orang ngempu laban nyema bisi peminta baru aku ngaga.

Entara bakul ti dianyam Jeba.

“Bakul aku laku laban aku ulih ngayam nitihka pemesai enggau chura ti dikedeka pemeli,” ku iya.

Iya mega meri besai terima kasih ngagai pemeli ti mayuh nyukung dagang ngaga bakul iya.

“Ngagai bala bukai, aram sama beranyam, anang malu tauka takut sereta ayanka asil pengelanding jari kitai ba media rama.

“Nembiak rebak baru ti bisi ngembuan pengerindu ke pengawa asal kitai baka beranyam, betenun enggau ke bukai tau belajar awakka bisi ditampung uchu ichit kitai dudi hari.

“Sapa ti deka belajar ngayam tau mega ngusung aku, kitai sama ulih bekunsi penemu ngayam,” ku iya.

Ngagai sapa ti deka ngudar bakul bemacham chura tau kita tau ngelawa facebook tauka instagram Jeba Saga.