LAWAS: Projek Jematan Pasar Lawas diatu udah manggai 97.27 peratus lalu dipelaba tembu bulan September tu, ti deka nyadi penyungkak pemansang enggau ekonomi ba kandang menua ngelui pasar Lawas.
Sapit Premier Sarawak Datuk Amar Awang Tengah Ali Hasan madah, sekeda pengawa tambah benung dipejalai dikena ngemanah enggau nyeruri perengkaguna ba jematan nya sebedau ulih ditengah bala penguna.
“Naka diatu, pejalai projek nya udah manggai 97.27 peratus lalu disadang tembu bulan September tu.
“Kitai mega benung bejalaika sekeda pekara tambah dikena ngemanahka agi jematan tu ngambi meri pemaik agi ngagai rayat,” ku iya lebuh ngabas pemansang pejalai projek nya, Hari Minggu tu tadi.
Ku iya, jematan sepemanjai 642 meter nya deka ngemandak timpuh pejalai ngagai pasar Lawas kelimpah ari nyendia jalai penyambung ti manah agi entara mengeri enggau kandang menua bukai baka Merapok sereta jalai ke Sabah.
Kaban Kunsil Nengeri (ADUN) Bukit Sari nya madah, projek tu sebagi ari pemansang rentayan jalai pesisir utara ti deka nembu ke sambung jalai adap utara Sarawak.
“Enti udah tembu ila, jematan tu deka ngemuntangka pengawa merambu pemansang ba sitak bukai sereta nyadi sebagi ari pengawa kitai ngemesai sereta ngemansang Pasar Lawas jemah ila,” ku iya.
Projek ti dipejalai Kaunsil Pemansang Koridor Wilayah (RECODA) nya mungkur ungkus kunterik lebih RM149 juta nyengkaum pengawa ngaga jematan ikonik enggau struktur tiang melengkung peninggi 44.3 meter, sistem kabel gantung kelimpah ari jalai raya besai. – EDISI UKAS
