MAKIN Sehari Makin Sayau siti lagu ti mujur ngangkatka nama Jennifer Jack dalam industri muzik Dayak sereta dikelala mensia mayuh.

Lagu nya dikerinduka mayuh orang nyentuk mujur nerima Anugerah Vokal Pemadu Manah serimbai Anugerah Charta Sapa Juara ti diatur Radio Televisyen Malaysia (RTM) Sarawak.

Pengerindu iya ba pengawa belagu nya endang dikembuan iya kenyau ari mit lalu diatu iya mujur begelar siku ari artis Dayak ti tebilang.

Maya beumur 12 taun, iya endang udah minat ngaul pengawa belagu sereta suah belagu enggau menyadi iya ti benama Jeffrey Jack.

Lebuh bisi maya lepa, seduai sigi reradak nebah nyawa bekaroake di rumah lalu ari nya mih minat Jennifer Jack ba pengawa belagu majak bebungai.

AKTIF BEPEKIT

Nya alai, laban ti minat belagu, dia dih iya suah masuk bemacham pekit belagu ti diatur ngelingi mengeri Kuching.

“Sebedau tepejuh ba dunya pemerindang Dayak tu, aku sigi aktif masuk bemacham pekit belagu ti bisi diatur ngelingi mengeri tu sekali ke nya dalam Jaku Iban, Melayu tauka English.

“Maya nya suba, tuju aku masuk pekit belagu tu ukai deka nyadi artis tang semina deka enggau orang ngeruh ai laban minat amat belagu.

“Mimit pen nadai mansa ba runding enggau ati aku tau begelar siku artis Dayak baka diatu laban aku ngasaika diri empu ukai sapa-sapa.

“Aku ngasaika diri empu kelalu mit taja minat belagu laban agi mayuh pekara bekaul apin diserungkai sereta dipelajarka aku enda nyalah baka langit enggau tanah ti jauh betingkah.

“Puji Tuhan! Engka tu udah selatan diatur Iya, diatu aku mujur begelar siku ari artis Dayak lalu aku chukup beterima kasih enggau temegah,” ku terang Jennifer Jack.

Entara pekit belagu ti kala dipasuk iya baka Pekit Antap Search ti diatur Cats.fm maya umur iya 15 taun lalu bulih penuduk champion lalu iya mih penyereta pemadu biak maya nya.

Kelimpah ari nya, iya kala masuk pekit belagu ti diatur Sarawak Artist Association (SAA) enggau mayuh agi ti bukai.

UDAH SELATAN

Ku anak pengkuan ari empat diri menyadi nya, pejalai iya dalam dunya pemerindang Dayak nya bepun ari sebengkah audisyen tebuka ti diatur serikat LUH ti bepalan di Sibu.

“Bisi sekali aku tepedaka iklan pasal audisyen tebuka ti diatur serikat LUH lalu aku ngujika nasip diri ngambi bagi ba audisyen nya.

“Enda memukai, aku mujur dipilih enggau diterima raban serikat nya lalu ditanya sida nyadi siku penanyi ba baruh perabung sida.

“Dia aku diberi peluang ngerikod enggau ngeluarka album penuh enggau album kompilasyen ba baruh perabung serikat nya.

“Nya mih pengepun pejalai aku ba dunya pemerindang Dayak tu sereta chakah ngeluarka lagu enggau merindang mensia mayuh nyentuk sehari tu,” ku terang iya.

Naka diatu, Jennifer Jack mujur ngeluarka mayuh lagu iya baka Makin Sehari Makin Sayau, Meruan Sayau, Terima Kasih Sulu, Rindu Ke Sulu, Chemburu, Bujang Menua Ili, Masau Pengerindu enggau mayuh agi ti bukai.

Lebuh ditanya pasal idola iya ba pengawa belagu, Jennifer Jack ngaku, iya chukup minat penanyi Krisdayanti, siku artis menua luar.

“Krisdayanti mih nyadi inspirasyen aku ba pengawa belagu tu laban iya ngembuan vokal ti nyelai enggau bekualiti.

“Aku mega rindu meda chara iya bepekayan enggau belematika leka lagu lebuh merindang ba atas panggau,” terang artis ti rindu meda Netflix nya.

TEKANG GEMALA

Ungkup penerang, tengan taun nyin kemari (26 Mei 2024), Jennifer Jack mujur ngeluarka lagu pemadu baru iya ti pejuluk Tekang Gemala.

Ku Jennifer Jack, lagu Tekang Gemala nya ngenang siku indu ti muji sereta temegah ati ngagai lelaki ti pemadu dikesayauka iya.

“Penatai Keling pesaka ati nya meri semangat, pengelantang enggau pengaga baru dalam pengidup indu nya,” ku iya.

Penanyi beumur 39 taun nya nyemetak madah, kisah dalam lagu nya nadai besangkut paut enggau pengidup iya.

Berebak enggau nya, iya ngelalau mensia mayuh seruran ngaku enggau masa orang ti berega ba pengidup sida.

“Nyema nuan udah tetemuka ‘tekang gemala’ ti berega ba pengidup nuan, anang sesekali ngayahka iya enggai ke nuan nesal dudi hari.

“Anang ketegal deka ngiga ke manah agi, nuan lenyau ‘tekang gemala’ nya lalu semina bulih kerimpak kacha aja.

“Lebuh nuan tetemuka sulu ati ti sanggup nerima pengurang penimpang nuan, sanggup dibai nuan merinsa, terima mih iya enggau pengabis ati lalu sayau ke iya siku aja,” ku lalau Jennifer Jack.

Lagu berentak ranchak nya, ku iya, ngembuan penyelai kediri empu sereta ngundan reti enggau ajar ti chukup dalam.

Nangkan nya, pedagang indu nya madah, ungkup taun tu, iya udah merambu ngeluarka sekeda lagu baru iya.

“Enti deka ngulih penerang pemadu baru pasal lagu nya, titih mih akaun media sosial aku baka Facebook Jennifer Jack Page enggau ti bukai,” ku iya.

PAIT MANIS MERINDANG

Sekumbang mekuh dunya pemerindang Dayak, mayuh peneleba manis enggau pait kala diasaika penanyi bajik burak lis nya.

Iya madah, dunya pemerindang nya mai iya bekelala enggau mensia mayuh, bala peminat sereta bakih baru.

Ukai naka nya aja, taun 2008 besai bendar reti ba iya laban mujur bulih Anugerah Vokal Pemadu Manah nengah lagu iya Makin Sehari Makin Sayau.

Baka bala artis bukai, Jennifer Jack bela enda tinggal napi penguji enggau asam garam dalam dunya pemerindang tu.

“Siti penguji ti balat ditapi enggau mangka pejalai pengidup aku ba dunya pemerindang tu iya nya suah dipetenahka orang sepeneka ati.

“Sekeda orang ti enda beradat betenahka aku sereta ngumbai aku baka tu baka nya tang aku nadai kala ngereja utai baka ti dipadah sida.

“Jaku petenah sida tu mai empas enda manah ngagai penuduk aku nyadi artis lokal dalam industri muzik Dayak tu.

“Kitai bela nemu, tebal agi orang pechaya agi ke jaku petenah sereta enda mansik pengamat pekara nya enti dibanding pemanah digaga kitai.

“Enti ari sukut bayar, aku chukup sinu laban sekeda pengatur program ti ngangauka kami artis lokal merindang ba program sida meri bayar enda nitih pematut.

“Nya alai, aku ngarap sida enggau raban bekaul meri perati ngagai artis lokal ti bekualiti nengah pengawa ngangauka sida merindang ba bemacham program tauka pengerami sereta meri bayar nitih pematut,” ku Jennifer Jack mantaika sebana diri.

Taja pia, iya napi semua nya ngena chara profesional enggau ngambi ari sukut positif aja.

BERETAN LAMA

Jennifer Jack ngarapka iya ulih beretan lama ba industri muzik Dayak ti majak mansang ke mua nitih pemansang kemaya hari.

Nangkan nya, iya ngarapka lagu iya terus nemban enggau dikerinduka bala peminat iya kelimpah ngarapka sida terus nyukung pejalai iya ba dunya pemerindang.

“Terus ke mih sukung kita ngagai aku ngambika aku ransing agi ngeluarka mayuh agi lagu bekualiti enggau meri empas ngagai industri muzik lokal dudi hari.

“Nya alai, ngena peluang tu, aku meri terima kasih ngagai semua orang ti semampai nyukung sereta besampika pejalai aku ba pengawa merindang tu.

“Kelebih agi bala peminat, kaban belayan, bakih, bakih sama industri enggau kami sebilik mega. Terima kasih laban meruan nyukung aku ari suba nyentuk sehari tu.

“Ngena peluang tu mega, aku meri Selamat Taun Baru 2025 ngagai semua sereta besampi taun tu mai mayuh agi berekat, pengaga, pengelantang enggau pemaik ngagai kitai.

Tuhan merekatka kitai semua!” ku iya.

Tampung Jennifer Jack, enti deka nemu silik pasal pengerembai pemadu baru iya titih mih akaun media sosial iya baka Facebook (Jenniferjackjj), Instagram (@jenniferjackempire) enggau TikTok (@jenniferjackjj).