KUCHING: Direktor Kampung Sarawak, Datu Hamden Mohammad meri pengaga ati ngagai komitmen enggau pengeransing raban pengereja Opis Kampung Sarawak (JHS) enggau bakih strategik gawa nentuka pengawa ngatur enggau nyaga kampung nengeri dipejalaika sechara meruan.
Ku iya madah, pemujur enggau pengaku ke diterima JHS sepemanjai taun 2025 iya nya asil kereja sechara beraban sereta pengandal ti diberi ngagai pangan diri.
“Kuing tuju strategik Opis Kampung Sarawak (JHS) taun 2026, senutuk enggau aspirasyen Strategi Pemansang Pasca COVID-19 (PCDS) 2030.
“Pekara ti deka diberi perati iya nya negapka urus perintah, pemansang modal mensia, nambahka pengawa neritka undang-undang, program karbon kampung, kimpin gadung beskala besai sereta negapka pansik enggau pemansang (R&D),” ku iya madah.
Iya mansutka jaku nya rambau Program Apresiasyen, Jaku Pesan Direktor Kampung Sarawak enggau Kuing Tuju Opis Kampung Sarawak 2026 ba sebengkah hotel di Kuching kemari.
Lebih 500 iku temuai ngulu program ke nya ke ngaul raban pengereja JHS, bakih strategik sereta pengari ari mayuh macham ejensi perintah enggau peribit.
Program nya ti ngena tema Rock ’n’ Roll richah sereta dirami baka ba dalam siti mini konsert, seraya ngayanka semengat segulai sejalai sereta pengaga ati diberi ngagai tetiap iku raban pengereja.
“Pengerami serak tu ukai semina deka meri pengaga ati enggau beperindang aja, tang nyadi kelai pengawa, penyerakup sereta motivasyen baru ngagai semua raban JHS ngambika terus nyingkang ke mua mai juluk ati baru nuju taun 2026,” terang iya. — TVS
