BINTULU: Ketegal suah ngambi bagi ba aktiviti komuniti ari mit mujur narak minat Joyce Morris Kapong terus nabur jasa ngagai komuniti ba menua ulu ba Lundu, Bario enggau Limbang.
Joyce ti gawa nyadi Pengajar Jaku ba CALC@UPMKB, Universiti Putra Malaysia Kampus Bintulu sanggup nujah jalai tanah enggau kampung dikena bejalaika aktiviti komuniti.
Iya madahka diri berengkah ngaul aktiviti komuniti nya lebuh nyempulang apai indai iya ngabas komuniti ba menua ulu ba Lundu, Bario enggau Limbang.
“Lebuh aku nyempulang seduai, aku ngasaika diri lantang pengudah naka ulih mantu komuniti dia,” ku iya.
Ku iya baru, pengawa iya ngaul aktiviti komuniti nyentuk sehari tu ngajar iya terus negap penyerakup raban etnik ba Tanah Kenyalang ditu.
Peranak Kuching bebansa Kelabit nya madahka diri balat ngemerat penyerakup ba komuniti Sarawak.
“Nyangka bisi orang ngumbai penyerakup tu pekara cliché tang kebendar iya tu meh nyadi peransang ngagai aku terus bejalaika aktiviti komuniti ditu.
“Kami tebuka ati belajar enggau nerima adat asal enggau chara idup pangan diri sereta naka ulih mantu pangan diri ngambi bela maju.
Iya ngaku, chakah agi iya bejalaika aktiviti komuniti, mayuh agi pemaik diulih iya kelimpah terus nyerungkai pesaka enggau bemacham main asal pupu bansa ba Sarawak.
“Aku andal penyerakup tu datai ari ulah kitai ti tegap bebasaka pangan diri. Pekara tu meh ti ulih ngempung kitai nyadi sebuah komuniti ti tegap,” ku iya.
Naka diatu, pengingat bejalaika aktiviti komuniti ba Sekula Primari (SK) Ulu Lubai (Sekula Ngembuan Penyulut Besai, Kohort Dua), Limbang ba taun 2022 semampai dikeingat iya.
Bekunsi peneleba bejalai ngagai SK Ulu Lubai ukai pekara ti muntang laban sida nujah pelajai enam jam ari Bintulu ke Limbang.
Raban sida bisi mansa Brunei, neresa babas enggau nujah jalai tanah sebedau ngenataika diri ngagai sekula nya.
“Ba din, kami bemalam berapa malam ba sekula nya sereta bejalaika aktiviti begulai enggau bala nembiak, pengajar enggau apai indai.
“Kami mega bepeluang nemuai ngagai rumah panjai ngelingi nya dikena ngelala silik agi komuniti dia.
“Dia kami ulih meda baka ni komuniti dia nyadi pemun ti tegap ngagai penyulut bala anak sida ti besekula ba SK Ulu Lubai,” ku iya.
