KALA ngasai ke peneleba labuh pengerindu ngagai siku orang ti chukup berega ba ati enggau pengidup kitai?

Nya siti kenang manis chukup romantik ti ngasuh ati kitai semampai bebungai siang enggau malam sereta ngasuh pengidup kitai bereti enggau penuh pengelantang.

Penyigat tauka pemajik iya ngasuh kitai gila bayang enggai badu ngenang, tuchum manis iya ngasuh ati kitai keketap belama, bau rengut tubuh iya ngasuh kitai beketup sima.

Tegu iya ngasuh kitai kekisi enda tentu penunga, perening mata iya manchar pengangat api pengerindu lalu sium iya tau ngasuh kitai lela baka ambun.

Iya mih enchuri kunchi pintu ati kitai ti udah lama bekunchi enda ditukang, mai penampak ngagai pengidup kitai ti udah petang dibalut malam.

Penyayau, penyiru, pengibuh enggau pementas iya meri pengering maya lemi sereta mai pengaga maya sinu.

Iya chukup berega! Naka mih enti kitai ulih ngempu iya sereta nyadi tawing ti deka nyempulang pejalai pengidup kitai ke mua.

Tawing ti ulih dibai kitai bekunsi pengaga enggau penyinu, ketawa enggau sabak, lantang enggau merinsa sereta maya bisi enggau maya nadai.

Naka pemanis enti ulih begulai ngempung dua ati nyadi siti nirika meligai ruang bilik idup melaki bini, beranak betelesak enggau beribun uchu nyentuk ke hari tuai.

Tentu nya juluk tuchi dua iku sulu ti benung nanggam pengerindu sebedau mai kaul seduai ngagai renggat ti rat agi.

Sebedau nyingkang jauh agi ngagai renggat pengudah nya, bisi siti pekara ti meseti dititih ke seduai iya nya adat nguai tauka ngugi.

Ba komuniti kitai Iban, adat nguai tu besai bendar reti dikena nentu kuing pejalai ruang bilik seduai dudi hari lalu tu enda tau enda diputus tumu sapa bagi siku ari seduai ti patut nguai.

Lebuh ba renggat tu, mayuh tawing ti benung nanggam pengerindu milih jalai beserara ketegal ditagang apai indai nguai.

DITAGANG NGUAI

Berebak enggau nya, siku penanyi biak, Valeria Bella Robinson mujur ngeluarka lagu iya ti pejuluk Sama Ditagang Nguai.

Lagu ti dikeluarka nengah pelasar YouTube Channel Kitai Entertainment kena 13 Februari tu tadi mujur dipeda ba penyuah urung 20,000 kali.

Nusui silik agi, Valeria Bella madah, lagu nya ngenang pengerindu dua iku sulu ti jelungan ba tengan jalai.

Iya madah, sinu mih seduai ngenang nasip diri ti bangat jai lalu perambu seduai ti deka idup sekunsi jadi melaki bini anchur bekechai nyadi debu.

“Nama daya seduai deka ngelaban selatan ti bangat kepapas, benih pengerindu ti ditanam seduai ngelama tu rumbau laban apai indai enda nyagi begulai.

“Seduai bela dipadu ke apai indai ngetanka bilik tuai enggau ngibun keresa lama.

“Nya alai, seduai enda ulih ngamat semaya diri ti deka idup sekunsi jadi melaki bini sereta begulai lantang nyentuk ke tuai baka orang bukai.

“Ketegal penanggul nguai, seduai nadai pilih bukai kelimpah milih jalai beserara taja nya ukai dikedeka enggau dipinta.

“Enggau ati berat penuh pemerinsa, seduai bela nguing mai singkang diri empu ti puang nadai tuju,” terang Valeria Bella.

PEKARA BARU

Lebuh nusui pengasai ati iya nyadaka lagu nya, Pemantu Butik Rosaria nya madah ke diri chukup gagit mai pengelain ba lagu nya.

Terang iya, ngelama tu iya suah nyadaka lagu berentak ranchak tauka pop tang sekali tu iya diasuh nyadaka lagu berentak ayun lundai.

“Ngelama tu aku suah nyadaka lagu berentak ranchak tang sekali tu produser ti mega penanyi bepenau, Tony Engkabi enchabar aku nyadaka lagu berentak ayun lundai.

“Nya alai, lebuh nyadaka lagu Sama Ditagang Nguai tu, aku berasai gagit laban mujur mai pengelain kelimpah belajar pekara baru.

“Aku diberi awak seminggu aja dikena nguasa enggau ngingatka lagu tu sebedau dirikod.

“Puji Tuhan, berekat ari embing enggau ajar iya, aku lanchar nyada sereta ngerikod lagu tu,” ku Valeria Bella.

UDAH SELATAN

Dunya muzik ukai pekara baru ba artis bajik beumur 23 taun nya laban pengerindu iya ba pengawa nya endang dikembuan iya kenyau ari mit.

Laban ti ngembuan pengerindu besai ba pengawa nya, dia iya suah masuk bemacham pekit belagu ti diatur raban sekula enggau organisasyen luar.

Taun 2024, besai bendar reti ba Valeria Bella laban nya mih pengepun iya mekuh dunya pemerindang Dayak nengah lagu single keterubah iya ti pejuluk Bujang Kanowit.

Pemungkal Channel Kitai Entertainment, Wilter Jr udah lama ngelala penau iya ba pengawa belagu sereta enda kakang ati meri iya peluang nyadi siku artis ba baruh perabung sida.

Nya alai, iya milih Valeria Bella nyadaka lagu Bujang Kanowit ti ditengkebang Boymax.

”Keterubah, aku asai ti bemimpi, entara bula enggau amat laban agi enda pechaya lebuh dipinta Wilter Jr nyadaka lagu tu.

”Ba maya sebaka, aku agi kakang ati laban aku ngeleda sapa mih aku tu lalu aku ukai sapa-sapa taja aku rindu belagu.

”Ta mit amat asai tudah diri lebuh diberi peluang nyada, ngerikod enggau ngeluarka lagu Bujang Kanowit tu maya nya suba.

”Aku empu pen enda nemu baka ni aku tau ulih tebuka ati neri kangau iya ngaul industri tu engka laban tiun lagu tu chukup manah sereta nemban enggau patah nyawa aku.

”Tu mih pengepun singkang aku ba dunya pemerindang Dayak tu lalu naka diatu aku mujur ngeluarka lima lagu single,” ku Valeria Bella.

Nya nyengkaum lagu Bujang Kanowit, Joget Bujang Mayuh Pantang, Pilih Siku, Sama Ditagang Nguai enggau Berai Enda Pulai Gawai.

Valeria Bella madah, penanyi bepenau ti tebilang enggau lagu Bajik Tuai, Leez Zwita nyadi inspirasyen iya mekuh pengawa merindang.

”Aku rindu amat mending ke lagu ari Leez Zwita kenyau ari suba nyentuk sehari tu.

”Iya ngembuan pengelain enggau penyelai kediri empu lalu patah nyawa iya manah didinga,” ku artis biak ti landik betanda nya.

BEMACHAM PENELEBA

Taja pen agi baru mekuh dunya pemerindang Dayak tang Valeria Bella udah ngasaika mayuh peneleba nyadi siku pemerindang.

Keterubah ngaul pengawa merindang suba iya kala ngasaika peneleba nyau deka matak diri ba pengawa tu laban apin bisi penemu merindang mensia mayuh ba atas panggau.

Taja pia, ketegal sukung sereta jaku peransang bala peminat enggau raban Channel Kitai Entertainment, dia iya berani ngangkatka diri baru.

”Begelar siku artis enggau dikelala mensia mayuh ukai pekara ti muntang tang aku pechaya genap orang bela bisi jereki kediri empu.

”Asal mih kitai ransing ngemansangka diri empu nunda singkang orang bukai,” ku iya.

Pia mega, dara Kanowit nya kala ngasai peneleba ngerikod lagu nyentuk tengah malam laban deka ngaga pemadu manah ungkup bala peminat.

Taja pen lelak sereta kiruh tang Valeria Bella besai temegah ulih ngaga pemadu manah dikena merindang bala peminat iya.

Lebuh rikoding nya, iya belajar mayuh pekara enggau nerima embing ari Tony Engkabi ti ngempu studio rikoding nya.

Nangkan nya, iya madah, laban ti bisi batang pengawa diri, iya suah napi penanggul deka magi awak diri bejalaika pengawa merindang.

Ku iya nerang, komitmen nyadi artis ukai semina merindang aja tang lebih ari nya baka semampai matih diri dikena nyaga kualiti patah nyawa, nguasa lagu, rikoding enggau nguasa panggau maya merindang.

SEMAMPAI DITERIMA

Lebuh bekunsi ke juluk iya dudi hari, Valeria Bella ngarap ke penatai iya ba dunya pemerindang Dayak enggau lagu iya majak diaku, diterima sereta nerima sukung tegut ari mensia mayuh.

“Aku chukup temegah ati ulih merindang kita sereta bekunsi pengaga enggau pemaik nengah lagu aku,” ku iya.

Nya alai, iya ngarap mensia mayuh kelebih agi bala peminat iya terus meri sukung tegut enggau jaku peransang ngambi iya ransing agi bejalaika pengawa merindang.

Berebak enggau nya, iya meri terima kasih ngagai semua orang ti ngelempai pengandal ati enggau meri sukung sekumbang iya mekuh industri muzik Dayak.

“Terima kasih ke sukung semua kitai kelebih agi bala peminat, bakih, bakih sama industri, kaban belayan enggau kami sebilik.

“Terus ke sukung kita ngagai aku enggau bala artis Dayak ti bukai ngambi kami ransing agi merindang bala kita.

“Aram mih kitai begempung nyaguka industri muzik kitai ngagai tikas ti tinggi agi,” ku Valeria Bella.

Nampung nya, iya madah, rebak baru diatu mayuh ngembuan penau belagu kelimpah rindu ke lagu berentak joget enggau balada.

Iya ngarap mayuh agi rebak biak ngaul pengawa merindang mantai penau sida dikena ngerichahka agi dunya pemerindang kitai.