KUCHING: Beberapa mosyen besai ti deka nentuka kuing Sarawak deka dibantai ba Konvensyen Besai Ke-16 Parti Pesaka Bumiputera Bersatu (PBB), ujung minggu tu.
Sapit Presiden PBB I, Datuk Amar Douglas Uggah Embas madah, entara mosyen nya meri perati ngagai isu bekaul politik, ekonomi enggau pelajar ti patut dikemanah dikena napi pemar deka datai.
“Ba konvensyen besai sekali tu, kitai meri awak ngagai bala kaban parti meri sadang penemu sida ungkup pemaik diatu, dudi hari enggau pekara ti patut dikemanah.
“Tu nyengkaum polisi baru nitih penemu sida ti patut diperunding bala tuai ngambi kitai ulih terus napi pemar dudi hari,” ku iya ba randau khas di opis iya ditu, tadi.
Uggah madah, 14 pengari ari Sayap Indu enggau Nembiak bela diberi peluang bejuraika isu bekaul pangku pengawa enggau pemesai guna sida dalam parti sereta meri penemu pasal polisi ke bisi diatu.
Ku iya, pengawa ngempung isu enggau sadang penemu udah belabuh ari renggat rating, bala kaban parti diberi peluang mantaika penanggul ditapi nyengkaum pengasi program bantu.
“Isu ti dibanti di renggat ranting tu mega deka dibai ke renggat pampang, sebedau dipejurai dalam Konvensyen Besai.
“Mayuh polisi ti dipejalaika Premier kebendar datai ari jurai dalam konvensyen tu.
Taja ukai semua kaban parti bisi peluang bejaku, bala pengari sida deka mai sada enggau peminta renggat baru,” ku Uggah.
Ngenang pasal chalun PBB ti bediri minta pilih ujung minggu tu, iya madah pengawa bepilih nya diatur chara demokrasyen.
“Kitai dalam PBB bediri minta pilih dalam siti ruang bilik, semua baka diri menyadi. Njya alai teju ke pengari kitai ngaga pemutus,” terang iya.
Konvensyen Besai Ke-16 PBB deka diatur di Palan Konvensyen Borneo Kuching (BCCK) kena 14 nyentuk 16 Februari tu dikena milih bala tuai ungkup penggal 2025-2028.
