KUCHING: Perintah Gempung Parti Sarawak (GPS) ba sebengkah penerang madah ke pengawa nyiri Kaban Kunsil Nengeri (ADUN) Satok, Datuk Ibrahim Baki nyadi Sapit Menteri Utiliti enggau Telekomunikasyen Sarawak (Utiliti) Sarawak Energy Berhad (SEB) enggau Petroleum Sarawak Berhad (Petros) bepun tadi.
Premier Sarawak ke mega Presiden GPS, Datuk Patinggi Tan Sri Abang Johari Tun Openg madah, pengawa nyiri nya udah ngujung ke Kabinet GPS bisi berubah mimit enggau ditusun baru.
Ubah mit ti dipejalai nyengkaum ADUN Pantai Damai, Datuk Dr Abdul Rahman Junaidi mangku pengawa nyadi Sapit Menteri di Opis Premier Sarawak (Penyeraris Projek Ungkup Ejensi Pemansang Kandang Menua, Dewan Bandaraya Kuching Utara enggau Pekara Islam) ti bepun tadi.
“Pengawa nyiri baru enggau ubah mimit dalam Kabinet Nengeri tu dikena negapka servis Perintah GPS ngagai rayat sereta nyungkak sektor kuasa nyengkaum pengawa beranakka puku dalam industri minyak enggau gas.
“Inisiatif tu mega deka nentuka Perintah Sarawak merambu strategi ti ngasi agi dikena nyapai visyen Sarawak nyadi siti kandang menua maju enggau bepenatai pemisi tinggi manggai taun 2030 di baruh Strategi Pemansang Pengudah COVID-19 2030 (PCDS 2030),” ku iya.
Abang Johari madah munyi nya ba aum pemberita pengudah Pengawa Angkat Sumpah Datuk Ibrahim Baki Ungkup Pangku Pengawa Sapit Menteri Sarawak di Astana Nengeri Sarawak, ditu tadi.
