PENGUDAH lelak ninga penyekut diau ba mengeri, tentu kita bisi ati deka ngasai ke penyenang sereta pengelantang jauh di kampung puang, sengian semina ninga bunyi burung sereta meda daun babas.
Ngasai ke pengelantang diau dalam kampung nya, siti berekat ti enda ulih ditiu ngena leka jaku, dani pagi ninga bunyi manuk engkukuk, pansut ke luar ngasai ke penyelap embun pagi, nyau asai ke bemimpi.
Bejalai ngagai tanju, meda rampa menua diberi Petara, meda panchar mata panas pagi seraya ngirup ai kupi angat, nyau asai ti duduk atas remang.
Nya mih peneleba ti deka diasai ke nuan lebuh tinduk ba Shiroh Campsite and Chalet di Kampung Sapit, siti genturung pendiau raban bansa Bidayuh ti pemadu semak enggau adan menua Indonesia.
Tebilang enggau rampa menua ‘remang baka tilam’, palan tu chukup nyelai laban diau ba peninggi 1,850 meter di atas bukit.
Nya alai, temuai ti datai ditu nyau alit ati meda pendiau remang ti baka tilam lebuh ditimpai ari tanju pagi hari.
Pengempu Shiroh Campsite and Chalet, Jessing Awos madah ke palan tu nyendia bilik endur tinduk, tanju sereta perengkaguna bukai ti ulih dikena bala temuai lebuh diau bemalam dia.
Ku iya, palan nya nyelinting ruang bilik, kaban belayan, bala bakih enggau semua
temuai ti deka ngasai ke peneleba tinduk begulai enggau rama menua ti agi beresi sereta lantang.
Palan tu mega nyendia perengkaguna baka ruai dikena duduk belelak, palan duduk ngirup kupi sereta palan endur nyumai.
Bala temuai mega ulih milih palan ti dikedeka sida empu baka dome for glamping, balai mini dikena ngatur program team building enggau ke bukai.
Siti agi penyelai palan tu, genap bilik endur tinduk diberi nama kayu berega menua Sarawak baka Chalet Tebelian, Chalet Engkabang enggau iya ti pemadu baru iya nya Cabin Akasia.
Nyendia palan tinduk berega belabuh ari RM150 nyentuk RM300 semalam, palan tu ulih dilawa sebarang maya, taja pia udar tumu meseti digaga dulu sebedau nya.
“Pengawa ngadu kangau tumu dulu nya beguna, ngambika kami ulih nyendia palan ti beresi, bisi puang sereta ke bukai.
“Sida ti deka datai kitu ulih milih sekali ke deka mai pemakai kediri tauka ngambi servis makai ti disedia kami empu.
“Kita anang irau, kandang endur chalet tu bisi disediaka pagar besi awak nadai jelu siga ulih tama kelimpah nyaga pengelikun temuai,” ku iya.
Ba palan nya mega kita ulih ngasai ke peneleba duduk ba tanju gelegar buluh ti digaga khas kena mensia mayuh meda embun pagi hari enggau gelumu remang lemai hari.
Ku iya, mensia mayuh ti deka ngasai ke peneleba tinduk sereta belelak ba Shiroh Campsite and Chalet tu tau telefon ngagai lumur 0198687732 tauka 0138167458.
“Aku ngelalu semua temuai ngasai ke penyamai sereta pengerindu meda remang ti chukup manah tauka tebilang dikumbai kitai village above the cloud,” ku iya.
