KUCHING: Opis Menteri Komunikasyen ngelalau Gerempung Pemberita Bagi Menua Kuching (KDJA) bekerejasama enggau Gerempung Berita Nasional Malaysia (BERNAMA) ungkup ngulih penerang bekaul pemekuh media ba Sarawak ti patut dibantu nengah Turu Kasih@HAWANA.
Menteri nya, Fahmi Fadzil madah, pengawa ngatur bantu ungkup turu nya dikena nentu bakih media ti napi bemacham isu baka penanggul pengerai tauka lenyau pengawa ngulih bantu lengkas.
“Aku bisi mantaika buah runding enti ulih raban KDJA mantu BERNAMA ti nyadi raban ngatur turu tu.
“Sebedau tu maya program besai Hawana bisi madahka urung 500 pemberita udah dibantu BERNAMA dikena ngulih pengawa nyaga nengah Perkeso ungkup taun keterubah.
“Nya alai, kitai benung nungkap sekali ke inisiatif bukai ti ulih dipejalaika kitai kelebih agi dikena nambah penatai pemisi bala pemberita,” ku iya.
Fahmi mansutka jaku nya rambau dirandau pemberita pengudah ngatur dialog begulai enggau pemekuh media sereta KDJA ba sebuah restauran ditu, kemari.
Nangkan nya, iya madah, Opis Menteri Pengereja Pengawa (KESUMA) agi nerus inisiatif pengawa ngerejister serikat ungkup program polisi gaji progresif.
“Opis menteri kami deka berandau enggau raban Kesuma dikena ngelala serikat media ti udah berejister ungkup program polisi gaji progresif.
“Aku ngarap enti bisi raban ngambi bagi ba program tu, raban kami deka mantu ngena chara ti nemban meransang raban bukai ti apin ngambi bagi ba program tu,” ku iya.
Iya madah, mekanisme dikena bejalaika gaji progresif ungkup sektor peribit ti ngaul media mega udah diputus enggau sekeda serikat ti bisi berejister.
