BETONG: Penatai urung 700 temuai ba Pengerami Ngirup Teh serimbai Pengerami Ngintu Hari Pengada Yang di-Pertuan Agong Ke-17 Renggat Sarawak 2026 mandang penaluk enggau basa rayat ngagai institusyen Yang di-Pertuan Agong ti nyadi Tuai Menua.
Pengerami richah enggau penatai Tuai Pemegai Menua (TYT) Sarawak, Tun Pehin Sri Dr Wan Junaidi Tuanku Jaafar begulai enggau bini, Toh Puan Datuk Patinggi Fauziah Mohd Sanusi sereta Premier Sarawak, Datuk Patinggi Tan Sri Abang Johari Tun Openg.
Pengerami nya mega mandangka semangat beserakup rayat pupu bansa di nengeri tu.
Ba komuniti di Bagi Menua Betong, pengawa ngatur pengerami besai nya endang siti basa besai.
Tebal agi, peranak ti bisi datai madah kediri berasai temegah laban diberi peluang datai enggau meda pengawa besejarah nya.
Tuai Kampung Hilir Beladin, Awang Subhi Awang Halil madah, pengerami nya ukai semina meri peluang ngagai rayat begulai ngerami hari besejarah menua tang mega nentuka sida meda kediri semangat beserakup ti ditanggam rayat pupu bansa enggau pengarap di Sarawak.
“Nengah mayuh aktiviti ti diatur, aku ulih betemu sereta berandau enggau mayuh komuniti sereta meda pengaya budaya ditu.
“Peneleba tu ngasuh kitai temegah nyadi rayat Malaysia sereta narak semangat taluk ke raja sereta menua,” ku iya.
Nangkan nya, siku orang gawa perintah, Ninie Racha Anding madah ke pengerami nya mandangka institusyen diraja nya payung ti ngempung rayat nadai ngira tirai juru.
“Penatai serap rayat udah ngemau semangat beserakup sambil negap identiti nembiak nyadi anak Malaysia ti temegah ngagai pesaka budaya menua.
“Aku chukup temegah laban Pengerami Ngintu Hari Pengada Yang di-Pertuan Agong Ke-17 Renggat Sarawak taun tu diatur di Betong.
“Inisiatif tu mai institusyen diraja semak agi enggau rayat ba renggat baruh,” ku iya nyemetak.
Pengawa dipun enggau pejalai Tun Wan Junaidi, Toh Puan Fauziah enggau Abang Johari ngagai Pemandang Raja Kita pengudah datai ba pelaman Balai Lumba Datuk Amar Tan Sri Stephen Kalong Ningkan pukul 10.30 pagi.
Sebedau pengerami belabuh diatur, mensia mayuh nyadaka lagu Ibu Pertiwiku disempulang Raban Pancharagam Polis DiRaja Malaysia (PDRM) nyengkaum 37 pegawai enggau raban.
Udah nya, pengawa ditampung enggau besampi ari Sapit Imam Besai Sarawak, Ustaz Mohamad Ihsan Haidzir, sebedau mandangka montaj ngena pejuluk Warkah Jalinan Kedaulatan Negara.
Simbolik bejadi, Tun Wan Junaidi dibasa nyirap pulut kuning sebedau nyuaka pemeri ngagai 50 penerima bantu Opis Pengelantang Komuniti Sarawak (JKMS) Bagi Menua Betong.
Penerima nya nyengkaum sida ti nerima Bantu Am (BA), Bantu Orang Tuai (BWE), Bantu OKU Enda Dapat Gawa (BTB), Elaun Pengereja Orang Nyelai Pendiau (EPOKU), Bantu Ngibun Pesakit Raya (BPT) sereta Bantu Nembiak Mit (BKK).
Bela datai, Sapit Premier Sarawak, Datuk Amar Douglas Uggah Embas enggau bini, Datuk Doreen Mayang, Menteri ba Opis Premier Sarawak ti mega Menteri Beempu Tanggungpengawa Ngintu Pengerami, Datuk Seri John Sikie Tayai begulai enggau bini, Datin Seri Melia Gelen enggau Sekretari Perintah Sarawak, Datuk Amar Mohamad Abu Bakar Marzuki sereta bini, Datuk Baduyah Bujang. – OSMAN RAZALI
