KUCHING: Kerejasama entara injinia enggau raban profesional ari bemacham bidang majak diguna dikena mutar pemar pemansang ti ngaul sektor energi, ubah klimet, artificial intellegence enggau industri maju.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madahka pemar nya enda ulih diputar siti disiplin injiniring tauka profesyen kediri aja.

Ku iya, injinia meseti bekerejasama enggau saintis, pemansik, kaban ekonomi enggau pakar teknologi dikena mutar pemar ti majak kompleks.

“Pemar bukai enda ulih diputar sebarang disiplin injiniring tauka profesyen kediri.

“Bidang energi, ubah klimet, artificial intellegence (AI) enggau industri pemadu maju majak begunaka injinia bekerejasama enggau saintis, pemansik, kaban ekonomi sereta pakar teknologi,” ku iya.

Iya madah munyi nya ba Pengerami Makai Lemai Ninting Taun Institusyen Injinia Malaysia (IEM) di Palan Konvensyen Borneo Kuching (BCCK), ditu kena Hari Minggu.

Berebak enggau nya, iya meransang injinia nambah bidang pengelandik diri sereta nanggam kerejasama ngilah industri enggau institusyen dikena meri peluang ngagai penemu baru sereta chara mutar ti praktikal.

Nambah ke nya, Datuk Patinggi Abang Zohari mega nyemetak madahka pemesai guna ngetan standard profesional ti tinggi ba bidang injiniring, lebih agi ari sukut kompetensi teknikal, integriti enggau tanggungpengawa profesional berindik ari pemutus injiniring bekaul rat enggau pengelikun mensia mayuh sereta infrastruktur.

Pia mega, ku iya, pemansang raban injinia udah tu meseti diperati nengah kerejasama IEM enggau universiti, sekula enggau industri, nyengkaum nengah iring, latih teknikal sereta pemansang profesional nentuka injia biak sedia napi teknologi baru enggau ubah dalam industri.

Bela datai iya nya Sapit Premier Sarawak Datuk Amar Profesor Dr. Sim Kui Hian, Presiden IEM Ir. Yau Chau Fong, Chairperson IEM Sarawak Datu Ir. Dr. Angelia Liew San Chuin sereta temuai dipebasa bukai. — EDISI UKAS