TATAU: Agih belanja ti dikemendar dikena ngaga gelanggang futsal baru di Taman Komuniti Sungai Jatan deka ngerembai fasiliti lumba enggau rekreasyen ungkup raban nembiak sereta komuniti menua di Tatau.
Kaban Parlimen Selangau, Edwin Banta nerangka pekara nya lebuh ngulu Karnival Lumba Komuniti SABERKAS 2026 di Dewan SABERKAS, ditu kena Hari Enam.
Fasiliti nya deka nyendia palan ti lantang agi ngagai peranak ngereja aktiviti lumba, lalu meransang rebak biak ngambi bagi ba aktiviti bepengerai enggau meri pemaik.
Iya mega nyemetak madahka pemesai guna tuai semampai ngundang lalu mendingka sada peminta rayat enggau meri perati ngagai isu ti ditapi peranak menua.
Nangkan nya, Chairman SABERKAS Pampang Kakus, Mohammad Rizal Julaihi madahka pengawa ngatur karnival nya entara chara ngundang mensia mayuh nengah aktiviti lumba enggau rekreasyen ti ulih nyempil kaul komuniti nadai ngira renggat umur.
Entara aktiviti ti disukung iya nya Engkabang Run ti mujur ngempuru 500 penyereta enggau dilepas Edwin.
Karnival nya mega ngatur bemacham aktiviti bukai nyengkaum pekit ngintu, futsal nembiak mit enggau sukaneka rayat ti meri peluang ngagai komuniti menua ngambi bagi ba aktiviti belepa begulai. — EDISI UKAS
