LIMBANG: Tirai juru pengidup ti seranta ukai penekul ngulihka pemujur, tang penetap ati, disiplin enggau pengeran ngiga penemu ulih ngubah pengidup orang jemah ila.
Fasilitator Dr Charlie Dudang mansutka jaku inspirasyen nya ngagai 104 iku chalun Sijil Pelajaran Malaysia (SPM) 2026 Sekula Sekondari (SMK) Medamit ba sebengkah Program Ngiri Penemu kena 6 November tu tadi.
Bekunsika pejalai pengidup iya, Dr Charlie madahka iya besai ba rumah panjai di menua pesisir ti nadai perengkaguna karan enggau ai beresi, nyentukka sida meraka sungai ngena perau panjai maya nurun sekula.
Iya madah, pengudah ngepunka pengawa nyadi kerani ba sebuah institusyen bank menua tu, iya mutuska diri deka nampung pelajar pengudah 10 taun gawa lalu mujur bulih Diploma Pengatur Dagang enggau Diploma Nampung Pengatur Dagang, Master Pengatur Dagang (MBA) enggau Lutur Falsafah Pengatur Dagang (DBA) dalam timpuh 11 taun.
Sekumbang 31 taun udah meri servis dalam sektor bank, iya kala niki pangkat lapan kali sebedau nyapai pangka pengawa menijar kanan.
Iya nangkan nya, ngambi pemutus ngetu gawa ba bank ba taun 2015 laban dikangau gawa enggau sektor Perintah Sarawak dibaruh opis Premier Sarawak.
Taja udah nyapai mayuh penyulut ba pengawa enggau akademik, Dr Charlie ransing deka nambahka penemu.
Bepegai ba polisi ngimpun ulah diri empu, diatu Dr Charlie benung nampung pelajar ngambi lutur falsafah (PhD) dalam bidang Psikologi di Universiti Malaysia Sarawak (UNIMAS) lalu andalka diri ulih terus meri bantu ngagai pemansang modal mensia jemah ila.
Iya madah, pemujur ukai semina ditentuka ari penatai ruang bilik, perengkaguna tauka pemutus peresa sebedau tu, tang kelebih agi bepanggai ba penetap ngelala potensial diri, nempa pengandal, merambu jemah ila sereta bejalaika pengawa enggau konsisten.
Dikena mantu chalun meretika pesan nya, Dr Charlie meri kelala langkar motivasyen C.H.A.R.L.I.E iya nya akronim ngagai sekeda jaku peransang ngagai nembiak ngambika sida belajar bebendar dalam sekula.
Langkar motivasyen tu mungkur reti C (ngelala diri empu), H (madam ulah ti enda manah), A (anjakan paradigma dikena ngubah chara berunding), R (perambu ti tegap nyapai juluk ati), L (bejalaika tanggungpengawa), C (pengeliat ati), E (runding ti manah) enggau S (strategi nuju penylut SPM 2026).
Chara tu ngemeratka pemesai guna ngelala pengulih diri, ninggalka ulah ti negatif, ngubah chara berunding sereta netapka juluk enggau tuju dalam pengidup.
Langkar motivasyen tu mega ngemeratka tanggungpengawa, integriti, pengeliat ati, beterima kasih ngagai sukung apai indai enggau pengajar, ngatur runding enggau nyikap diri napi peresa.
Iya ngelalau chalun ngambika chakah ngubah, ngaga analisis, ngatur jam sereta nguasa strategi nyaut, kelimpah ari nyaga pengerai, disiplin enggau pengarap ati.
Ba pengujung randau motivasyen nya, bala nembiak diembing nyebut ‘Ikrar Tindakan JUARA SPM 2026’ kelai komitmen belajar bebendar, bebasaka apai indai enggau pengajar, ngatur jam enggau pintar sereta enda mudah putus pengarap.
Sama bisi datai raban pengajar SMK Medamit nyengkaum Prinsipal SMK Medamit, Linda Liau, Penulung Kanan Pekara Pelajar Evette Sagim; Penulung Kanan Pengatur enggau Pelajar, Penny Metius; Penulung Kanan Kokurikulum, Linda Runggah enggau Pengajar Kaunseling, Douglas Sebastian.
Program nya nerima sukung ari 50 iku pengajar bukai enggau penatai 80 iku apai indai tauka penyaga.
