PAKAN: Urug 150 penyerta ari 13 rumah panjai ba menua Nunggang udah nglulu Program AgriCOP Pelilih Pakan dikena nambah penemu enggau peransang ngaul diri ba sektor betanam betupi.
Penyandang Penemu ba Opis Premier Sarawak (Industri Pemakai, Komoditi enggau Pemansang Kandang Menua), Tan Sri William Mawan Ikom madah, program nya begun a endar dikena ngerandang peluang nyerungkai pengulih betanam betupi nyadi penatai pemisi ke mansang agi.
“Betanam betupi enda patut dikumbai semina ke diempa aja, tang patut dikemansang nyadi siti pengawa dagang ke ulih meri asil ekonomi ngagai ruang bilik,” ku iya.
Mawan nyebut jaku nya ba Pengawa Nangguh Program AgriCOP Pelilih Pakan di Rumah Cynthia Sangau Jamit, Ulu Nunggang, ditu empai lama.
Iya madah, menua Nunggang ulih mansutka asil betanam betupi, lebih agi buah ke ngelama tu udah nyadi pemansut ekonomi peranak menua.
Nya alai, iya meransang peranak ngelala peluang makit ke engkeman ngambi asil utai tanam ulih dijual mayuh agi sereta meri untung.
Mawan mega madahka pemesai guna beratika pemanah tanah endur betanam nipatka gaya menua dikena merambu pengawa ngemansangka tanah.
Iya mega bisi minta Opis Betanam Betupi chakah agi ngembing peranak ngena teknik betanam, produktiviti enggau pekara makit.
Program nya bela nerima kerejasama tujuh ejensi, nyengkaum Opis Betanam Betupi enggau Raban Penyaga Orang Periman Malaysia (APM), ungkup ngemujurka mayuh aktiviti. — EDISI UKAS
