KUCHING: Bisi 100 unit rumah ulih dibeli deka digaga nengah pemansang Skim Nangkir Genturung Pendiau (SPK) Samariang ungkup renggat keterubah, lebih agi dikena nyaup raban nembiak di Samariang bisi rumah kediri empu.
Sapit Menteri ba Opis Premier Sarawak (Undang-Undang, MA63 enggau Kaul Nengeri – Perintah Besai), Datuk Sharifah Hasidah Sayeed Aman Ghazali madahka agih belanja ungkup projek nya udah dikemendar nyengkaum pelin lalu deka nyadi entara inisiatif pemansang ti meri pemaik ngagai peranak menua.
Ku iya, pengawa nyendia rumah ulih dibeli nya entara inisiatif Perintah Sarawak tetangkupka peminta rayat, kelebih agi rebak biak ti begunaka rumah enggau rega ti patut.
“Renggat keterubah nya ngaul 100 rumah ulih dibeli khas ungkup peranak di Samariang, lebih agi nembiak kitai lalu agih belanja ungkup projek tu dikemendar sereta pelin nya,” ku iya.
Iya madah munyi nya ba Program Belepa Begulai Enggau Indu Samariang, ditu kena Hari Minggu.
Kelimpah inisiatif berumah, iya madahka pengawa ngatur bemacham program pemansang di Samariang mandangka inisiatif betampung Perintah Sarawak nangkup peminta komuniti dia.
Iya mega meri terima kasih ngagai Raban Indu PBB Pampang Samariang ngambi ngatur program ti nyendia awak ngagai raban indu berandau sereta ngaul diri ba aktiviti komuniti.
Program nya mega digulu Sapit Menteri Besai, Datuk Amar Fadillah Yusof begulai enggau bini, Datin Amar Ruziah Mohd Tahir, ti ngatur demonstrasyen nyumai nyadi entara isi program.
Bela datai, Tuai Raban Indu Parti Pesaka Bumiputera Bersatu (PBB) Pampang Samariang, Hanifah Saed enggau Naib Yang Dipertua Harakah Islamiah (HIKMAH) Sarawak Toh Puan Hayati Ahmat. — EDISI UKAS
