Kerejasama S’wak – kompeni besai ditempa

KUCHING: Sapit Kepala Menteri Datuk Amar Douglas Uggah Embas madah Sarawak begunaka mayuh agi kerejasama enggau kompeni besai.

Ku iya, kompeni besai ulih mantu nambah asil eksport produk menua kelebih agi ba asil betanam betupi.

Uggah ke mega Menteri Betanam Betupi, Tanah Adat enggau Pemansang Kandang Menua madah, pemujur kerejasama nya deka mai pemaik ngagai semua piak dalam industri.

“Kompeni besai tu udah meretika pinta makit luar baka Singapore, China, Eropah sereta menua bukai.

“Nya kebuah kitai milih siti kompeni ari Johor nyadi kompeni besai ke alai sida udah ngelakuka buah rian kitai ke menua China lalu dikemujur dalam timpuh enam bulan aja.

“Enti kitai milih kompeni ditu, atur pengawa begunaka timpuh ti panjai laban sida deka dulu meresa infrastruktur kitai lalu kitai mega enda tau enda nitihka penetap makit,” ku iya madah nyemetak.

Uggah mansutka jaku nya ba aum pemberita pengudah nerima penemuai kereja raban Menteri Kanan Singapore, Chee Hong Tat di opis iya di Wisma Bapa Malaysia tadi.

RANDAU PEMANSANG… Uggah (empat kanan) bejaku ba aum pemberita di Wisma Bapa Malaysia tadi, sama dipeda Chee (dua kiba)