Kerita angus ngelantak tiang api

KUCHING: Siku lelaki bakal pengudah kereta Perodua Viva iya ngelantak tiang api lalu angus.

Nitihka penerang ari Palan Gerakan Operasyen Bomba Sarawak, sida nerima kangau ngenyit pasal penusah pukul 5.15 pagi tadi.

Sebelas raban bomba ari Balai Bomba enggau Penyah Penusah (BBP) Batu Lintang betuaika PBK II Arisa Arshad ngesah ngagai endur penusah nyadi.

Lelaki nya diripot ngelantak tiang api tisi jalai lalu ngelantak selapat jalai ba Batu 8, Jalai Penrissen ditu.

Beduduk ari nya, injin kereta iya lalu angus.

Piak Bomba ngerara api ngena ai ari tangki perengka pengangkut sida dataika api mujur dirara.

Nitihka ripot, kereta Perodua Viva angus 100 peratus.

Taja pia, lelaki nya mujur mansutka diri lalu semina bakal mimit aja.

Nadai penusah bebadi nyawa diripot nyadi lalu operasyen tembu pukul 5.38 pagi.

RETUNG… Sebuah kereta Perodua Viva angus 100 peratus ba penusah bebadi ba Jalai Penrissen ditu tumu pagi tadi.

Suara Sarawak