Kes positif di Sibu enda disadang – Robert Lau

SIBU: Kaban Dewan Negara Senator Robert Lau Hui Yew madahka pemayuh kes positif Covid-19 di Sibu endang ngelui ari diperagam (enda disadang).

Taja udah 22 hari bejalaika timpuh Atur Mindah Betagang (PKP), ku iya, Sibu agi enda mujur nagang pengerekai penyakit nya.

“Agi mayuh kes ba Sibu. Ensana Sibu ngerikodka 101 kes.

“Semina 32 kes aja datai ari Kluster Pasai,” ku iya bejaku ngagai pemberita, kemari.

Tu bereti, ku Lau, penyampau kes ti ditemu datai ari palan bukai di Sibu.

Mensia mayuh benung berintai nganti gintir diri beperesa Covid-19.

Tandu iya, kes ti dirikodka tu udah ngerekai ba Sibu, ukai semina di rumah panjai aja.

“Diatu udah bisi kes nyadi ba semua pupu bansa Sibu.

“Semina nitihka Atur Pengawa Standard (SOP) aja jalai dikena kitai ngurangka kes enggau mutuska rentayan pengerekai penyakit nya,” ku iya nyemetak.

Lau terus nangkan mensia mayuh ngambika enda mindah kin kia sereta anang bejalai enti nadai kebuah besai.

Nangkan nya, Menteri Muda Kaunsil Kandang Menua enggau Pengawa Berumah Dr Annuar Rapaee mega madahka iya kesal meda 101 kes positif Covid-19 nambah ensana ba Sibu.

“Kes positif Covid-19 di Sibu kemari (ensana) niki ngagai 101 kes!! Dini 101 kes nya?

“Bisi 29 kes ari ‘Active Case Detection’ ba rumah panjai lalu 82 kes ba genturung mengeri Sibu!,” ku Menteri Muda Pelajar, Sains enggau Pansik Teknologi nya.

Iya madahka Sibu agi bedau ulih mutuska rantai kena rampit penyakit seagi enda nitihka SOP PKP.

“Minta kita anang keluar ari rumah,” ku iya.

Adun Nangka nya mega ngarapka rayat Sibu terus bekerejasama enggau perintah nitihka SOP PKP baka ti dilalau sebedau tu.

Suara Sarawak