SIBU: Sebuah gelanggang bol keranjang di Lorong 18, Sibu Jaya nyadi selinting raban orang ti enda beradat lebuh sida ngerusak enam lampu jalai solar dipasang peranak lokal dia.
Isu nya nyadi kena 9 November tu tadi lalu ngujungka sida ti main bol keranjang ti begunaka lampu nya dikena main muak ke malam berasai asa sereta ngaga ripot polis.
Gelanggang nya udah lama enda diseleti tang suah nyadi palan bala nembiak bekupan bejalaika aktiviti sida dia lebih ari 10 taun ti udah.
Taja pen udah lama, lampu jalai solar rusak enggau tiang gol pen udah betegar tang gelanggang nya tetap nyimpan mayuh pengingat manis ngagai peranak Sibu Jaya.
Chairman Parti Demokratik Progresif (PDP) Pampang Sibu Jaya, Kaunsilor Paul Teo Ming Pau madah, iya kala bemain ba gelanggang nya maya agi ba sekula sekondari suba seraya madah ke iya asa meda ulah raban orang ti enda beradat nya.
Iya madah, sekeda peranak dia sanggup ngeluarka duit ari kuchik sida empu urung RM4,000 dikena meli enggau masang enam lampu jalai solar dikena nentu sida ulih bemain dia nyentuk malam.
