KUCHING: Diberi basa macha ikrar Hari Nembiak Sarawak 2023 nyadi kenang pemadu berega ngagai jaguh tinju biak Sarawak, Daeloniel Mcdelon Bong.

Pengempu Tali Sementing Persekutuan Tinju Asia (ABF) nya madah kediri chukup temegah ati lebuh nemu diri dilempaika pengandal macha ikrar nya.

Iya ti tebilang agi dikangau Kilat Boy madah, nya terubah iya diasuh macha ikrar ti chukup besai reti ba mua bala mayuh enggau ba pengerami renggat nengeri.

“Berasai temegah ati endar laban diberi basa macha ikrar nguluka bala nembiak bukai ba mua bala menteri, pemesai, pegawai enggau bala bukai.

“Basa diberi ngagai aku tu kebendar udah ngemauka agi sempun semangat dalam ati lalu meransang ati ransing agi ngulihka pemujur sereta ngetanka tali sementing ABF ujung taun tu,” ku iya lebuh dirandau Ruai, Suara Sarawak.

Nya alai ku Kilat Boy, iya ngarapka jaku ikrar ti dibacha nya ukai semina dibacha pia aja tang reti ikrar kebendar patut ditemu enggau ditarak sereta dikemeran.

Iya madah, ukai muntang ngulihka pemujur dijapai diatu enti enda ari pengepuh, pengeliat ati enggau pengering semangat diri empu disempulang sukung bala bukai.

“Ari nya, aku ngarapka tu ulih meransang nembiak bukai nitih ke pemujur aku enda ngira ari pengawa main enggau lumba, pelajar enggau mega pekara manah ke bukai.

“Arapka kitai ke nyadi nembiak seruran seati enggau pangan diri, bebasa sereta netapka juluk ati enggau komitmen ungkup pemansang menua,” ku iya nyemetak.