KUCHING: Perintah Sarawak senurut aja ba sebarang pemutus ti digaga Perintah Besai enggau Perintah Selangor nyema Lumba Malaysia (SUKMA) Ke-22 ditangguh.

Menteri Nembiak, Lumba enggau Pemansang Orang Dagang Sarawak, Datuk Seri Abdul Karim Rahman Hamzah madah, pekara nya apin diputus chara rasmi. “Aku baru aja nemu pekara tu lalu pemutus apin ditetapka chara rasmi.

“Tang, Sultan Selangor merambu Lumba ti deka diatur di Selangor bulan Ogos tu ditangguh nyentuk penyarut ba Timur Tengah badu, ukai dikinsil.

“Kitai enda nemu kemaya penyarut tu deka badu.

Aku nemu pekara tu nengah media sosial enggau ripot berita, nya kebuah mar deka meri timbal laban Perintah Selangor apin ngaga pemutus,” ku iya.

Karim madah munyi nya lebuh dirandau pemberita pengudah ngulu Pengawa Bejadi Muzium Pesaka Industri Limbungan Brooke (BDY), ditu malam kemari.

Dulu ari nya, Sultan Sharafuddin Idris Shah merambu lumba bemacham achara nya dilanjar nyentuk penyarut serantau badu.

Pia mega, nentuka pengawa nyeruri Stadium Shah Alam tembu seraya berundingka ungkus besai.

Karim madah, Sarawak udah besikap silik taja enda menuku.

“Kitai udah ngagihka besai belanja ngambi kontinjen besikap lalu semina berapa bulan da sebedau Ogos.

“Mayuh atlit udah belatih nyengkaum sekeda nya ba menua luar.

“Pejalai ngabas ba semua semilan pelilih di Selangor mega udah dipejalai ngambi ngelala endur diau baka rumah temuai ungkup kontinjen Sarawak laban lumba nya semina meri perati ba Shah Alam tang diatur ba bemacham endur,” ku iya.

Iya ngaku asa nyema ditangguh, tang nyemetak madah ke pemutus kepenudi bepanggai ba raban bekuasa bekaul.

“Aku pechaya, Perintah Selangor sereta Opis Menteri Nembiak enggau Lumba deka berati ke perambu tu lalu ngaga pemutus sekali ke lumba tu deka diterus tauka ditangguh,” ku iya.