KUCHING: Projek Nganti enggau Ngemanah Sistem Pengatur Trafik Langit ba Wilayah Pekara Penerang Penerebai Bilun Kota Kinabalu (Kota Kinabalu Flight Information Region – KKFIR) deka nyadi pelasar ngemanahka sistem pengelikun data (frontend and backend user).
Direktor Kaunsil Bekuasa Penerebai Bilun Perintah Malaysia (CAAM) Wilayah Sarawak, Hajijah Mohd Bujang madahka projek nya mega deka ngemanahka agi tikas pengelengkas Sistem Pengatur Patau Trafik Langit Sabah enggau Sarawak seraris enggau sistem digital sereta Revolusyen Industri 4.0 (IR 4.0).
“Sektor penerebai bilun nyadi siti ari sektor pemadu beguna ba pengawa ngemansang ekonomi menua.
“Nya alai, CAAM enggau Opis Menteri Pengangkut keran deka ngemanahka agi sistem pengatur patau trafik langit Sabah enggau Sarawak,” ku iya.
Hajijah bejaku munyi nya rambau pengawa Operasyen Radar ba Kuching ba baruh projek KKFIR ditu, kemari.
Ku iya, pengawa tu dipeda engkeman ba timpuh diatu laban pengerembai ekonomi ti majak manah ba sektor penerebai bilun pengudah suman ari pandemik COVID-19.
“Sistem Pengatur Trafik Langit ba Sabah enggau Sarawak udah nuju ngagai gaya digital penuh seraris enggau jeman ti majak moden.
“Tu nyadi pekara ti patut dijapai dikena nambah pengelengkas koordinasyen sereta pengelikun penerebai bilun entara Wilayah Pekara Penerang Penerebai Menua serimbai enggau KKFIR baka Ujung Padang FIR, Singapura FIR enggau Manila FIR.
“Diatu radar ba Kuching, Kota Kinabalu enggau Sandakan udah dikemanah ngagai Mode S enggau penyauh palan ti ulih dilawa radar mega udah nambah,” ku iya.
