Komiti baru Aedil udah mujur dipilih

KUCHING: Gerempung Pemansang Pelajar Jaku Iban (Aedil) udah mujur ngatur aum besai dua taun sekali gerempung nya kena 6 April tu tadi ba Institut Pematih Pengajar (IPG) Batu Lintang.

Siti ari tuju aum nya endur milih komiti besai tauka Exco Aedil bagi timpuh 2019 – 2021.

Ba pengawa bepilih exco nya, Dr Lambat Anak Lindong mengkang nyadi presiden lalu sapit iya Jamu anak Galeh.

Tanggung pengawa sekretari ke penggal tu diberi ngagai Dr Stanley anak Ajang, nganti Harold Unsie. Dr Stanley dibantu Sapit iya Philip anak Michael Meggong. Tukang Wang enggau Penulung Tukang Wang, Ding anak Giri enggau Mr Moris anak Henry Manjat.

Semilan iku kaban komiti ke bukai nya Mariam anak Sabai, Robin anak Sabai, Harry anak Aton, Upin anak Mula, Etam anak Linggi, Ipot anak Angki, James anak Siba, Ngabong anak Katoi enggau Isa anak Lee.

KOMITI BARU…Dr Lambat Lindong (duduk tengah) begulai enggau raban komiti baru Aedil ungkup taun 2019 – 2021.

Dr Lambat meri besai terima kasih ngagai semua ti udah meri diri nyukung pengawa Aedil kenyau ari terubah gerempung nya ditumbuhka.

Iya bisi endar pengandal ati ba raban komiti ti baru udah dipilih sereta arap Aedil ulih ngereja utai ti lebih badas ari ke udah.

Naka ke diatu pemayuh kaban Aedil ari serata menua tu nya 917 iku. Kitai arapka Aedil ulih nyungkak sereta ngangkatka pemanah pemutus peresa Jaku Iban ba tikas PMR enggau SPM.

Nambahka nya kitai mega arapka Aedil ulih bekempit enggau perintah menua kelebih opis pelajar awakka jaku Iban ulih mansang seriris enggau jaku bukai di menua tu. Munyi ku sempama “Ditemu buah ari langgu, Dikelala bansa ari jaku.”