SERIAN: Raban bansa Bidayuh diansak beambi ulih ari inisiatif Projek Dokumentasyen Tanah Adat Bidayuh (LDP) nentuka hak ngempu tanah adat terus dijaga enggau diaku.
Jaku ansak nya ditibar ba sesyen penerang enggau randau LDP ti mungkur Pelilih Serian, Tebedu enggau Siburan di Dewan DBNA Serian, ditu, kena Hari Satu tu tadi.
Presiden Serakup Bansa Dayak Bidayuh (DBNA) Sarawak, Datuk Ik Pahon Joyik madah, projek dokumentasyen tanah adat nya udah belabuh kenyau ari taun 2007 suba.
Ku iya, projek nya asil inisiatif enggau pengeran Datuk Amar Michael Manyin Jawong begulai enggau bala tuai supreme DBNA.
“Inisiatif tu ditegap lebuh siti komiti ngatur pengawa ditumbuh ba taun 2009 ungkup ngatur pengawa ba tanah, sebedau projek nya dianjung berenggat nengah inisiatif LDP ari taun 2009 nyentuk diatu.
“Raban bansa Bidayuh patut beterima kasih laban perintah nengeri udah meri pemendar bejalaika pengawa ngaga dokumentasyen tanah adat tu,” ku iya.
Ik Pahon madah baru, DBNA mega diberi mandat rasmi nengag surat puncha kuasa ari Opis Tanah enggau Survei Sarawak ungkup ngatur projek nya.
Ngenang pekara bekaul, iya madah ke Program Roadshow 2.0/2026 ti diatur di Serian nyadi siri ketiga pengudah di Lundu enggau Bau.
Ku iya, inisiatif nya dikearap ulih marit mayuh agi komuniti enggau juluk mayuh agi genturung pendiau kena bungkur projek manggai taun 2030.
Seraya Sapit Menteri Industri Pemakai, Komoditi enggau Pemansang Kandang Menua Sarawak, Datuk Martin Ben meri terima kasih ngagai visyen enggau inisiatif Datuk Amar Michael Manyin ngamatka inisiatif LDP lebih sepuluh taun ke udah.
Taja pia, iya madah kediri irau laban agi tubah empai enggau projek nyengkaum sekeda genturung pendiau, kelebih agi ba Pelilih Serian enggau Tebedu.
Iya ti mega Kaban Kunsil Nengeri (ADUN) Kedup madah, naka tu semina 58 ari 113 genturung pendiau di Pelilih Serian ngaul diri ba projek nya, seraya di Tebedu, semina 14 genturung pendiau ngambi bagi dibanding 51 genturung pendiau ti bedau.
Berindik ari nya, iya meransang bala tuai genturung pendiau sereta unit DBNA di Serian, Tebedu enggau Kedup sama netapka Tikas Penyulut (KPI) sida empu nentuka projek lanchar enggau nyapai tuju ditetap.
“Peluang tu patut dikena manah laban meri mayuh pemaik ba pengawa negap hak ngempu tanah ba raban bansa Bidayuh,” terang iya. Penerang enggau randau nya mega dibantai Chairman Teknikal LDP DBNA Sarawak, Datu William Nyigor sereta Dr. Chali Ungang.
Program nya diperati nyadi pelasar beguna dikena negapka pengawa ngaku tanah adat, lalu nentuka pesaka raban bansa Bidayuh terus dijaga ungkup rebak dudi nengah surat Pala Tanah ngena Seksyen 18 Kanun Tanah Negeri dikeluarka Opis Tanah enggau Survei Sarawak.
Sama datai, ADUN Bukit Semuja, John Ilus enggau ADUN Tebedu, Dr. Simon Sinang Bada.- EDISI UKAS
