KPDNHEP chakah matau dagang di Kapit

KAPIT: Urung 39 ari 369 buah palan dagang ti diperesa udah dikompaun RM4,400 rambau Ops Bersepadu KPDNHEP dipejalai ditu apin lama ke udah.

Nitih ku Ketuai Pemesai Penerit Adat KPDNHEP Nengeri Sarawak Mohd Hanizam, barang berega RM11,342.40 mega udah dirampas laban enda nitihka atur enggau undang-undang dagang ti udah ditetap KPDNHEP.

Operasyen dipejalai dua hari berunggu berengkah ari 10 nyentuk 11 April di Kapit ke alai 69 buah palan dagang udah diperesa lalu 11 ari palan nya dikompaun sepenyampau RM1300 sereta rega barang dirampas manggai RM6311.20.

Iya mansutka jaku tu rambau aum pengarang berita di opis sida empu di Jalai Penghulu Gerinang ditu pengudah tembu meresa palan dagang di Pasar Kapit enggau Makit Teresang.

Ku iya, operasyen tu dipejalai beserimbai enggau pengerami Gawai Dayak ti deka diintu enda lama agi.

Mohd Hanizam madah batang tuju operasyen tu dipejalai dikena neritka atur enggau undang-undang ngagai serap komuniti dagang.

“Tu kelebih agi nyelinting sida ti bejualka barang diguna besehari sehari, sida patut nitihka rega udah ditetap.

“Mensia mayuh mega dipinta ngeripot enti sema bisi tetemuka pedagang ti enda ngelanggar atur enggau undang-undang udah ditetap,” ku iya ngelalau.

Ripot tau dianjung ngagai sida nengah dua chara, nuju aduan@kpdnhep.gov.my tauka telefon nuju lumur 1800 886 800, Palan Penerit Adat (ECC) 03-8882 6245/6088 tauka Malaysia Government Call Centre (MYGCC) 03-8000 8000 sereta whatsapp 019-279 4317.

NERITKA ATUR… Mohd Hanizam benung beratika rega manuk idup ke dijual ba Makit Teresang.

Suara Sarawak