BINTANGOR: Inisiatif nambah kualiti pelajar ba sitak Kunsil Nengeri (DUN) Meradong terus diberi perati nentuka raban sekula ulih ngajar enggau belajar lantang agi.

Kaban Kunsil Nengeri (ADUN) Meradong, Datuk Ding Kuong Hiing madah, pelajar nyadi pugu ngulihka sukung sosial ti positif kelimpah nyamin pengidup menyana rebak biak dudi hari.

Ku iya, bemacham inisiatif udah enggau deka terus dipejalai dikena mantu sekula primari enggau sekondari ba semua pelajar, kelebih agi ari sukung nyeruri perengkaguna enggau fasiliti sekula.

“Aku nguji naka ulih mantu sekula ba menua tu nengah pengawa nyeruri perengkaguna enggau ngenapka pengawa Opis Menteri Pelajar Malaysia (KPM).

“Juluk aku deka meda nembiak ulih belajar enggau manah sereta lantang,” ku iya nyemetak.

Kuong Hiing nibar ke jaku nya ba mua mayuh rambau Pengerami Graduasyen Pom Enam Sekula Sekondari (SMK) Meradong ditu, kemari.

Iya mega madah, SMK Meradong nyadi siti ari palan pelajar ti bisi pengulih besai nempa penyulut ba renggat pelilih, nengeri, nasional sereta antarabansa, kelebih agi ba kokurikulum enggau lumba.

Berindik ari nya, iya andal ke sekula nya ulih nempa mayuh agi nembiak ti bepenau, ulih besemekih enggau ngembuan ulah ti menuku.

“Aku pechaya enggau andal ke SMK Meradong deka terus nyapai pemujur ba kurikulum, kokurikulum enggau nyeridi ulah nembiak ti menuku,” ku iya.

Kuong Hiing madah baru, pengerami nya seriris enggau juluk ngaku, meransang enggau nyukung nembiak ngambi terus ransing ngulihka pegawa.