Kuching Palan Pesaka Pintar keterubah

KUCHING: Perintah Sarawak bekerejasama enggau serikat telekomunikasyen Huawei ngangkatka Kuching nyadi menua pintar enggau peneras transaksyen tiga sikin nengah teknologi 5G.

Ku Kepala Menteri Sarawak Datuk Patinggi Abang Johari Tun Openg Kuching deka diangkat nyadi Palan Pesaka Pintar keterubah ba menua tu.

“Ke diatu, perambu ngangkatka Kuching nyadi palan pesaka pintar agi dipansik.

“Semua penerang deka digempung lalu deka dipasuk ngagai rentayan servis ngambika ulih dipeda mensia mayuh,” ku iya.

Abang Johari mega madah pegawa deka ngaul kerejasama raban polis ti matau penyalah rama baka enchuri kerita, pengawa salah ba media rama tauka pengawa bukai enggau jampat.

Abang Johari

“Nentuka juluk nempa Sarawak nyadi menua pintar kitai mungkal pengadi di Kuching ditu dulu sebedau dikerembai ngagai menua bukai.

“Inisiatif perintah tu mega ulih ngerumban pemansang enggau nyungkak ekonomi ba ruang bilik ari penyampat servis transaksyen,” ku iya madah nyemetak.

Nangkan nya, perintah diatu benung ngatur pengawa nyendiaka kereban pintar (smart devices) ngambika ulih disambung ngagai servis 5G dudi hari.

Abang Johari mansutka jaku tu lebuh ngulu enggau bejadika Pengawa Ngelanchar Sarawak Pay – KK Super Mart di Batu 7, pagi tadi.

Sama datai Ketuai Sistem Penerang Sarawak Sdn Bhd (SAINS), Datuk Patinggi Tan Sri Dr. George Chan Hong Nam, Adun Batu Kitang Lo Khere Chiang, Menijar Besai Kaunsil Multimedia Sarawak (SMA) Dr. Zaidi Razak, Direktor RELA Nengeri Sarawak, TPjR Rini Tupong, Ketuai Polis Pelilih Padawan Supt. Aidil Bolhassan, Residen Bagi Menua Kuching Sherrina Hussaini, Penguasa Kanan Bomba Handeri Ardimanshah sereta bala bukai.