KENYALANG Park Commercial Centre enda kala sengian genap kali kalinda lunar nyau semak.

Tanglung mirah ti nyau tayuntayun dipuput ke ribut lemai, pengerichah nyawa betawar ke barang enggau bau rengut kuie asal ti ngemenuhka langit enda nyalah ngangau ke baru pengingat lama ti disimpan teguh ngelama tu.

Ba dijir bansal ti bemacham chura, bungkus kuie sepit nyau betusun manah ngasuh ati tekait. Tang ba genap kepin kuie nya ti kekerup dikunyah, bisi siti kisah pasal pengepuh jari ti ngaga kuie nya sereta pengelengau besai ti nadai ganti.

NAMPUNG LEGASI

Ba siku nembiak, Mohd Danieh, 23, Kenyalang Park udah nyadi rumah kedua iya.

Laban ti nyadi rebak ketiga, iya ngesan pangku pengawa besai ti ditinggalka niang aki iya.

Enti suba, aki iya semina nyual kuie sepit enggau agar-agar gulung aja tang diatu Danieh mai singkang berani nyual bemacham bansa kuie nyengkaum biskut asal enggau kek lapis.

Taja pen mayuh kuie bukai tang kuie sepit tetap nyadi kedap ngagai dagang kuie iya. Genap kuie nya digaga enggau penuh kasih sayau di dapur rumah sida ngena resipi khas sida sebilik empu ti diturunka ari aki iya.

Nya alai, genap bungkus kuie ti nyau betusun manah nya endang asil pengepuh enggau penyilik ti chukup berega.

“Tebal agi pemeli China endang ngiga kuie sepit tu genap kali pengerami Taun Baru China.

“Sida rindu amat makai kuie asal tu ti enda tentu manis,” ku Danieh ti bela gawa nyadi penganjung pemakai.

Ba iya, inisiatif nya ukai semina dikena ngulih penatai pemisi tambah tang siti danji dikena nentuka nama sida sebilik terus lekat di Kenyalang Park genap kali musin pengerami.

PENGELIAT ATI

Pemanah chura Kenyalang Park enda menyana enti nadai Roslan Kulaini, 48, asal ari Kampung Bintawa Ulu.

Nyau deka 10 taun udah bejalaika dagang mit nya, Roslan chukup mereti kualiti nyadi jematan besai nempa pengandal bala pemeli.

Iya seruran sedia nerima mayuh timbal ari bala pemeli dikena ngemanahka agi pengasai sereta kualiti kuie iya ngambi nemban enggau pengasai pemeli ti tebal agi bebansa China.

Pengelantang nya terus ditegap enggau penatai Lalitha Anadom, 71. Pengelama 15 taun, iya udah bejalaika dagang mit nyual kachang burak, murukku enggau tuchur rodeh.

Nya alai, penatai Danieh, Roslan enggau Lalitha mandang identiti Sarawak ti amat taja bebida resipi enggau budaya tang sida idup begempung ba baruh siti pelasar pengelantang.

BERASAI LELENGAU

Ba aku, penemuai ke Kenyalang Park ungkup taun tu mai reti besai ba aku empu.

Tu enda nyalah ngirit aku pulai baru ngagai pengingat berapa taun ti udah ti meruan nyengenda dalam untak aku.

Berengkah ari keterubah jadi melaki bini, laki aku enda kala puntan nemuai kitu.

Juluk iya semina siti aja, ngiga kuie sepit ti pemadu tulin ungkup indai iya.

‘Indai rindu amat makai kuie sepit’. Nya mih jaku ti nyadi peransang iya nyentuk sanggup nujah jalai alun ti sekut di Kenyalang Park.

Enda ngira diri empu kiruh tauka pisit baka ni langgur gawa, iya tetap napatka bansal nya ketegal deka meli kuie sepit ke indai.

Aku agi ingat naka mih pengaga niang entua indu aku genap kali nerima bungkus kuie nya.

Iya deka nyimpan kuie nya ba balang kacha lalu bunyi kekerup kuie sepit ti dikunyah nyadi ‘tiun muzik’ lebuh kami berandau pagi.

Nya siti pengaga ti semina jelan aja tang nya mujur ngempung ati anak enggau indai.

Diatu, genap dua taun bangku entua indu aku udah puang. Gaya pagi pengerami pen nyau enda baka suba, nadai agi bunyi kekerup kuie sepit ti sebaka didinga.

Taja pia, laki aku tetap ke Kenyalang Park ungkup meli kuie sepit ari pedaja sebaka.

Lebuh ditanya, iya semina mantai tuchum tabar. Aku chukup mereti, iya meli kuie nya ukai ungkup diempa tang dikena ‘meli’ pengingat manis nya. Genap kepin kuie sepit nya enda nyalah siti ‘surat pesan pengerindu’ ti dikirum ngagai pengingat indai ti udah nadai agi ba dunya injau tu. Nya siti chara dikena ngemantup enggau merap pengelengau ti besai ngagai niang indai ti enda ulih ditiu enggau jaku.

SERIBU SATU CHERITA

Kenyalang Park nyadi saksi pemakai ulih meraka adan etnik enggau umur.

Ditu mih ruang siku nembiak nampung legasi aki iya, siku pedaja nyaga ati bala pemeli iya enggau siku anak lelaki ti ngidupka baru kemayang indai iya nengah sebungkus kuie sepit.

Nyema kita bisi nemuai ke Kenyalang Park, beli mih sebungkus kuie sepit.

Sepi mih penyamai kuie sepit ti kekerup lebuh dikunyah lalu aku mih jari ti nyendia kuie nya.

Ba sekeda orang, kuie nya mih nyadi jematan ti agi nyambung sida enggau orang ti pemadu dikesayau ke sida.

Di Kenyalang Park, kasih sayau enda kala bari tang ditungkus rat ngena kuie sepit ti ngundan seribu satu cherita. – LEE NYUK LAN/ JAPEN