KUCHING: Nadai sapa nyangka semina begunaka awak urung dua jam di studio, lagu Dayang Bintang ulih mai nama Gabriel Mawat Clement Saran, 24, nyingkang ke panggau Anugerah Industri Muzik (AIM) 25 lalu dipadu nyadi pemenang keterubah kategori Lagu Borneo Pemadu ti keterubah diatur ba anugerah tebilang nya.
Ba Mawat, pemujur nya enda disangka laban lebih rikoding, iya enggau bala bukai semina ngerikod lagu lalu enda nyangka lagu nya nerima timbal ti chukup manah nyentuk sehari tu.
“Kebendar, kami enda nyangka lagu tu deka ‘meletup’ baka diatu.
“Pengawa rikoding lagu enda lama, kita sejаm nyentuk dua jam aja,” ku iya ba aum pemberita pengudah AIM25 di Palan Konvensyen Borneo Kuching (BCCK), malam kemari.
Lebih ari semina tengkebang muzik, lagu Dayang Bintang nyagu kisah bepelasarka cherita lama bekaul siku indu benama Dayang Bintang.
Ku Mawat, identiti asal mega nyadi pengelebih lagu nya lebih korus ngempung gaya muzik asal Iban baka jawang enggau ramban dikena ngasilka bunyi ti bebida.
“Kami enda nyangka lagu tu dichalun, enda nyangka tama renggat final lalu enda nyangka sekali tau menang kategori tu.
“Berasai chukup gaga laban tu entara pemujur pemadu tinggi kami naka diatu,” terang iya.
Berebak enggau nya, Mawat madahka sukung bala peminat enggau diri sebilik nyadi entara kebuah ti nentuka lagu Dayang Bintang majak dikerindu kelimpah prinsip iya bela kemerah enggau semua peminat nadai ngira umur, tirai juru tauka penuduk.
“Anang sumbung enggau bala peminat. Nadai ngira sekali ke sida nembiak mit, orang besai tuai, orang tuai, pengereja tauka sida ti bepangkat.
“Kitai meseti ngembuan ulah kemerah enggau sida baka bakih tauka diri sebilik,” ku pesan Mawat.
Pengudah mandangka tengkebang muzik Iban ulih rembus panggau muzik Malaysia, Mawat diatu ngembuan juluk ati mai muzik nya ngagai renggat antarabansa lalu Indonesia, Amerika Syarikat enggau Korea Selatan antara makit ti deka diselinting.
“Kami deka nguji rembus ngagai renggat antarabansa. Engka Indonesia, Amerika Syarikat tauka Korea Selatan.
“Kami pen enda nemu, tang kami pechaya jereki sigi bisi,” terang iya.
Ba pekara sama, Mawat madahka sida benung merambu projek baru nyengkaum kolaborasyen begulai enggau artis ari Sabah enggau pemekuh muzik bukai di Malaysia.
Lebih manis, lagu Dayang Bintang empu udah bisi versyen jaku Melayu ti asal iya ia disedia ngambi dibai ngagai Anugerah Juara Lagu (AJL), tang apin tejapai.
“Enti peminat dekaka versyen jaku Melayu, kami naka ulih ngeluarka nya ila,” ku iya.
Ba penemu Mawat, pemujur AIM25 ukai singkang kepenudi Dayang Bintang, tang nentuka singkang jauh agi nyagu muzik Iban enggau tengkebang anak seni Borneo.
Iya mega ngarapka kategori Lagu Borneo Pemadu Manah meruan dikena dikena ngerandang mayuh agi peluang ngagai pemekuh muzik ari Borneo.
Lagu Dayang Bintang, asil tengkebang enggau leka ditulis Maxwel Franklin Saran, ti dikelu ar nengah MVM Music enggau Assapai Music Production.
Kategori baru nya dipejalai ba AIM25 kelai ngaku tengkebang muzik ari Borneo, seraya nyendia mayuh agi peluang ngagai asil tengkebang dibantai ba industri muzik menua.
Anugerah nya disua Premier Sarawak, Datuk Patinggi Tan Sri Abang Johari Tun Openg lalu disempulang Menteri Dagang Temuai, Industri Kreatif enggau Seni Pemerindang Sarawak, Datuk Seri Abdul Karim Rahman Hamzah lebuh malam AIM25. – RUSNAN MUSTAFA
