Lagu Puang, cherita pengelengau Lady Jay nuju niang DSP Micheal Padel

KOTA SAMARAHAN: Bini niang DSP Micheal Padel iya nya Jabah Mingku Voon, 42 mantaika pengelengau ngagai niang laki iya nengah lagu baru, Puang ti udah bulih 5,300 iku orang meda (views) ba Youtube kenyau semilan bulan ke udah.

Niang Micheal Padel midang maya diserang raban penyelawai ba Kampung Simunul, Semporna di Sabah kena 2 Mac 2013.

Komposer Iban tebilang iya nya Matthius Mambang enggau jesley Jabu dibaruh perabung serikat Kaban Music Production (KMP) Sdn. Bhd udah ngansah pengelandik Jabah belagu.

Ngena nama Lady Jay ba dunya pemerindang, Jabah suah dikangau merindang bala peminat ba selampur Sarawak.

“Tang, diatu menua napi penusah ketegal pandemik Covid-19, nya kebuah kami nadai dikangau belagu tang aku fokus ngagai pengawa bedagang.

“Keterubah iya aku belagu laban nya utai dikerindu aku lebuh maya belepa enggau ngelantangka ati diri,” ku iya lebuh dirandau Suara Sarawak ba rumah iya, ditu kemari.

Jabah madah, Matthius enggau Jesley deka nengkebang lagu ke aku lebuh sida ngusung kedai makai iya.

“Sebedau tu, aku bisi muka sebuah kedai makai ke suah nyadi palan ngelancharka album baru bala artis Iban.

“Nya kebuah, bisi sekali aku belagu maya pengawa ngelanchar album ngujungka dua kompiser nya tekait ati enggau patah nyawa aku,” terang Jabah sentang baka ni dua komposer nya keran deka nengkebang lagu ke iya.

Jabah ti ngabas pendam laki iya seminggu sekali ba Pendam Bujang Berani mega bisi ngeluarka sebuah lagu berentak dangdut dikumbai Pengerindu Setengah Jalai.

“Diatu, aku bisi ngeluarka lagu dalam album kompilasi begulai enggau artis Iban bukai iya nya Stell N, Steve Sheegan, Marshella enggau Celestine dibaruh perabung KMP Sdn Bhd.

“Aku bedau berani ngeluarka single tauka album kediri laban pekara nya agi tumu,” tandu iya.

Taja pia, iya madahka diri ngembuan juluk ati deka ngeluarka album dudi hari.

Suara Sarawak