MARUDI: Sitak Kunsil Nengeri (DUN) Mulu diatu dibagi ngagai empat sitak pemansang besai dikena ngemaru langgur pemansang ba menua ulu.
Sapit Menteri ba Opis Premier Sarawak (Pengereja Kasar, Imigresyen enggau Patau Projek) ti mega Kaban Kunsil Nengeri (ADUN) Mulu, Datuk Gerawat Gala madah, empat sitak pemansang nya baka Pemansang Poyut Lubok Nibong (PPLN), Komiti Pemansang Sitak Tutoh, Pemansang Kedaya Telang Usan sereta Komiti Pemansang Sosio Pelilih Mit Bario.
“Pengawa bebagi sitak tu dikena nentuka semua Tuai Komuniti enggau Tuai Raban Bansa (KMKK) duduk begulai ngambi berandau sereta ngelanggur pemansang ti mungkur endur ti besai agi nengah chara berurun,” ku iya.
Gerawat madah munyi nya lebuh bejadi Aum Besai Pemansang Poyut Lubok Nibong (PPLN) 2026 ti diatur ba Pasar Marudi, Hari Enam tu tadi.
Ku iya agi, pengawa numbuh pelasar pemansang nya ukai melakang pangku pengawa sereta tanggungpengawa KMKK ke bisi diatu tang nyadi pelasar tambah negap kerejasama enggau nyeraris pemansang ba renggat kandang endur.
Ku iya, inisiatif nya mega deka ngemuntang ejensi perintah bejalaika mayuh projek pemansang ba menua ulu kelebih agi ba sektor betanam betupi sereta pemansang infrastruktur jalai ti chukup diguna komuniti lokal. – EDISI UKAS
