Langkau Padang Empelaie Ili digaga beripai

“Pengawa mujur ari penemu, seati enggau serakup ngereja pengawa beripai pulaika pengelantang enggau pemaik rayat.” – Tuai Rumah Millai Pipit.

SARATOK: Pengelantang rayat semampai dikemerat kelebih agi ba pekara infrastruktur pemun di menua pesisir.

Ku Tuai Rumah Millai Pipit ari Empelaie Ili Saratok, penemu rayat renggat patut digempung dulu.

“Baka kami serumah berundingka pengelantang bala ti rindu meda orang main bol ngelaban panas enggau berujan ngelama tu.

“Kami teulihka runding nirika langkau padang tauka dikumbai langkau padang meri pengelantang ngagai mensia mayuh meda pekit ke diatur dia.

BESAUP… Sida ke lelaki dipadu gawa ngiga kayu ti tau ditebang nyadika ramu dikena nirika langkau padang.

“Pekara tu dibai dalam aum kena 11 November 2018, disara enggau dipejuraika bala mayuh, baru kami bulih diputus,” ku iya ngelansa lebuh dirandau Suara Sarawak.

Iya madahka aum nya udah diatur sida serumah sebedau ngatur Pekit Main Bol Mangkuk Krismas kena 24 Disember taun nyin tadi.

“Kami serumah 31 pintu di Plaie endang merambu deka gawa beripai nirika langkau padang tu laban nemu pengawa deka lempung enggau gerah dikereja bebala mayuh.

“Tambah mega mayuh tubuh ke gawa laban genap pintu nyauka sampal nurun, rindu gawa begulai kelimpah ngempitka kaul kami sebala,” ku iya madahka diri lantang ati meda peneguh kaul serakup nembiak redak.

Ngelansa pasal pengawa sida nirika langkau padang ku Tuai Rumah Millai, pengudah nerima bantu belanja penyampau RM15,000 ari Kaban Parlimen Saratok Ali Biju, sida lalu berengkah gawa.

UNGKUP PENGELANTANG RAYAT… Langkau Padang Empelaie Ili mujur bediri ari pengeran rayat Rumah Millai dekaka pengelantang.

“Kena 22 Julai tu tadi, kami belabuh beramu. Bala ke lelaki nyengkaum sida ke nembiak bela nurun ke tanah, ngiga kayu ti tau disayat nyadika kasau, tiang enggau papan.

“Sida ke indu mega ngatur pengawa bukai baka nyendiaka pemakai kami ke lelaki pulai ari nyayat seraya nyendiaka kereban berumah bukai kena gawa.

“Kami belabuh ngentak tiang kena 28 Julai. Bala ti udah dipadu gawa endang bisi seling penemu ba pengawa berumah laban tebal agi pengawa berat dikereja.

“Tembu tiang didiri, kami lalu ngelantak ring, kasau enggau ngatap. Lalu pengawa nyambung langkau padang tu ditampung ninting Hari Minggu, lebuh bala diau enggau lepa pengawa,” ku iya nerang silik.

Nangkan nya ku Tuai Rumah Millai, sida deka nampung pengawa kena 4 enggau 11 Ogos tu lalu langkau tu disadang tembu dalam bulan Ogos tu mega.

Ku iya, pengawa nyembu berebak enggau Komiti Pemansang enggau Pengelikun (JKKK) Emplaie Ili ngatur Pekit Main Bol Merdeka tang pekara tu agi diperambu laban berundingka pemisi belanja.

Nya alai iya andal amat ngenataika peminta belanja ngagai opis enggau ejensi bekaul mantu sida ari sukut belanja dikena ngemujurka pengerami nya ila.

“Aku ngarika kami serumah di Emplaie Ili meri besai terima kasih ngagai Ali Biju sereta Parintah Pakatan Harapan (PH) ti udah ngagihka belanja ngagai JKKK kami dikena ngemujurka projek langkau padang ba Padang JKKK Emplaie Ili tu.

“Penyiru pengari rayat ke kami nyata dipeda ari pengeran iya ngemai pemansang enggau nangkup peminta bala rayat ditu pulaika pemaik enggau pengelantang semua,” ku iya madah nyemetak.

Tuai Rumah Millai mega ngarapka Ali Biju enggau Perintah Besai di baruh pegai gempung PH seruran chakah bejalaika projek pemansang kelebih agi infrastruktur enggau penyikap perengka guna pemun ngagai kandang menua pesisir.

“Besai amat pengandal kami ke nyadi rayat renggat baruh di baruh pegai perintah baru tu deka ampit buah pemansang ti diulih ari sulu jaku Merdeka tu.

“Enggau tu mega bala kami serumah ngarapka Ali Biju enggau Perintah PH ulih mantu kami nampung langkau nya diperambu kami didiri ngelingi padang nya.

“Kami mega andalka juluk ati ngangkat Lumba enggau main sereta ngemanahka standard padang JKKK nyadi stadium mit ditu deka dipending enggau diperunding,” ku iya ngemai peminta rayat menua nya.

Kelimpah ari ngemansangka pekara lumba enggau main, Tuai Rumah Millai mega ngarap sektor ekonomi bala sawit enggau lada deka diperati nitihka pematut nentuka tikas pengidup rayat deka maju agi sereta ulih ngasaika pengidup menyana.

Suara Sarawak